Al torne ancje par chest an scolastic 2022/2023 l’apontament cul Premi speciâl ARLeF pai elaborâts in lenghe furlane plui biei, che lis scuelis a podaran presentâ te suaze dal concors “Premia la classe”, promovût di Città Fiera.
In cheste gnove edizion dal premi, lis classis a podaran impiâ la lôr origjinalitât te lenghe furlane cun riferiment al teme “Se jo o fos un sienziât tal gno laboratori o inventarès…”.
La inizitive si indrece a dutis lis classis des scuelis de infanzie e des scuelis primariis dal teritori furlanofon e si divît in dôs categoriis:
- Categorie Scuele de infanzie e scuele primarie – Concors di dissen
Realizazion di un dissen ispirât al teme “Se jo o fos un sienziât tal gno laboratori o inventarès…”. Si pues presentâ lis oparis in forme individuâl (singul student) o coletive (classe). Si à di doprâ la lenghe furlane, daûr de grafie uficiâl, e si invide a doprâ materiâi e tecnichis diferentis par realizâ i dissens. Si premiaran la creativitât, la inventive e l’aspiet linguistic dai elaborâts.
- Categorie Scuele primarie – Composizion di un test
Produzion di un test in lenghe furlane sul teme “Se jo o fos un sienziât tal gno laboratori o inventarès…”, lunc almancul mieç sfuei di protocol (2 pagjinis). Si premiaran la creativitât, la inventive e lis competencis linguistichis (scriture daûr de grafie uficiâl de lenghe furlane).
I elaborâts si varan di consegnâ ai uficis di Città Fiera dentri dai 20 di Fevrâr dal 2023.
La ARLeF e premiarà la miôr produzion di ogni categorie cuntun bon di € 250,00 par comprâ bens utii ae didatiche al insegnament.
Cun di plui, tant che ricognossiment de partecipazion ae iniziative, la Agjenzie e regalarà a dutis lis classis un DVD di carton animâts in lenghe furlane o une publicazion in lenghe furlane.
Consulte i materiâi
| Ogjet | Cjale |
| Dut il regolament |
|
