Lenghis-Ladint al è un strument didatic pal aprendiment de lenghe furlane intun contest di insegnament plurilengâl. Ideât intal 2014 dal prof. Adriano Ceschia e fat dal CLAAP – Centri di Linguistiche Aplicade Agnul Pitane cul finanziament de ARLeF – Agjenzie Regjonâl pe Lenghe Furlane, Lenghis al è un strument informatic che al ten dentri une biblioteche digjitâl e un laboratori di esercitazions (cun modui di leture, scolte e completament di peraulis) pai fruts e pai insegnants.
Lenghis al è pensât prin di dut pal insegnament dal furlan, ma al pues jessi doprât par ogni lenghe e alfabet: il furlan al pues jessi associât a ogni lenghe, taliane o altre, in mût che l’aprendiment di ognidune al puedi vê i stes vantaçs. La lenghe furlane e pues jessi par esempli tratade inte forme de koinè o inte forme des sôs variantis gjeografichis internis.
Lenghis al permet di verificâ e di valutâ i aspiets dal aprendiment linguistic, graduant la dificoltât des esercitazions daûr des competencis di base e dai obietîfs prefissâts. I insegnants a puedin doprâlu tant che strument za complet di contignûts o, dopo di une formazion specifiche, a puedin doprâlu tant che contignidôr struturât par inricjîlu di materiâi didatics gnûfs za sperimentâts in classe.
Lenghis al è stât presentât ai insegnants e ai dirigjents scolastics ai 12 di Novembar dal 2015 li dal auditorium dal Palaç de Regjon a Udin, metint in mostre i contignûts, la flessibilitât di ûs, la utilitât e la eficacitât ancje a pet de pussibilitât di autovalutazion dal insegnant, e lis potenzialitâts dal strument. In chê ocasion a son stadis cjapadis sù lis adesions pal prin Cors di formazion (di 10 oris, fat inte Vierte dal 2016) util par acuisî sedi la competence di programazion des unitâts di aprendiment, che chê aplicative. Cun di plui, e je stade proponude ai insegnants la pussibilitât di presentâ Lenghis al cuarp insegnant intai istitûts scolastics e di sperimentâ il strument dentri des classis: a chestis ativitâts e ae sperimentazion didatiche a àn aderît i istitûts comprensîfs di San Denêl, di Pavie, di Dael e di Trasaghis.
Pal disvilup e pe implementazion sistematiche dal program e je stade istituide la Comission Didatiche Lenghis – Ladint, là che a operin insegnants esperts de scuele de infanzie, primarie e secondarie – di letaris, furlan, inglês e di altris materiis – che a àn lis competencis justis par costruî lis unitâts didatichis che a van a inricjî in maniere progressive il program informatic.
Pes scuelis e pai insegnants
Al è pussibil domandâ un incuintri di presentazion dal strument Lenghis e, in maniere seguitive, un percors formatîf par inviâ la sperimentazion didatiche dentri dal istitût. Par gjoldi di cheste oportunitât, in forme gratuite, si pues scrivi a: arlef@regione.fvg.it, segnant ducj i dâts (non, cognon, materiis insegnadis, istitût di riferiment). Daspò dai incuintris propedeutics, al sarà pussibil domandâ il program didatic ae ARLeF, che e comunicarà il numar di licence, sore nuie.
Ai 21 di Novembar dal 2019, te aule magne dal Liceu Sientific
“G. Marinelli” di Udin, il strument al è stat presentât intune conference vierte a ducj i insegnats e i dirigjents des Scuelis primariis di prin grât dal Friûl.
Chest strument informatic al ufrìs un percors di didatiche eficace e moderne, bon di sostignî i insegnants cun materiâi za pronts par jessi doprâts, valorizant ancje risorsis, progjets e materiâi che a puedin insiorâ il strument e dant ai docents la pussibilitât di cjapâ part aes ativitâts tal svilup dal progjet.
Consulte i materiâi
| Ogjet | Cjale |
| Cjale la schede tecniche di Lenghis |
|
| Program Presentazion Lenghis 2015 |
|
Imagjins
