#Didatiche #Formazion #Scuele

Docuscuele

Docuscuele – Centri di documentazion, ricercje e sperimentazion didatiche pe scuele furlane

Docuscuele al è un progjet strategjic di politiche linguistiche e di educazion plurilengâl, finanziât de ARLeF – Agjenzie Regjonâl pe Lenghe Furlane e de Regjon Friûl – Vignesie Julie, inviât de Societât Filologjiche Furlane in colaborazion cul Ufici Scolastic Regjonâl, che al vûl meti in rêt progjets e competencis e creâ ocasions di confront, di insiorament e di progjetazion intal setôr dal insegnament de lenghe furlane.

Intal Dicembar dal 2016 al è stât firmât un protocol di intese tra la Agjenzie Regjonâl pe Lenghe Furlane e la Societât Filologjiche Furlane cul obietîf principâl di costituî e di implementâ il Centri di documentazion, ricercje e sperimentazion didatiche pe scuele furlane tant che un pont di riferiment par ducj i insegnants di lenghe furlane.

DIREZIONS OPERATIVIS
Docuscuele al lavore lant daûr di cuatri trois operatîfs:

  • la documentazion: racuelte di materiâi, progjets, publicazions su la didatiche in/di lenghe furlane;
  • la formazion: ativitâts didatichis intes scuelis, percors di inzornament pai insegnants;
  • la informazion: incuintris e distribuzion di materiâi pai insegnants, arlêfs e fameis; gjestion di un sît internet e di un servizi di newsletter;
  • la produzion e la distribuzion di materiâi didatics pes scuelis furlanis (par esempli i fassicui didatics “Marilenghe te scuele”).

OBIETÎFS:

  • fâ cognossi e fâ doprâ lis “buinis pratichis” che a son il risultât dal lavôr di insegnants e di professioniscj;
  • fâ cressi simpri di plui il numar di esperiencis inovativis;
  • promovi une rêt di insegnants che e puedi miorâ cul timp la cualitât dai progjets pe lenghe furlane;
  • stimolâ i insegnants a fâ une formazion continue;
  • sostignî lis fameis dai arlêfs par fâ une sielte cussiente de lenghe furlane a scuele.

Docuscuele al è a disposizion dai insegnants, dai arlêfs e des fameis. Al contribuìs, su la fonde des esperiencis presintis in altris contescj talians e internazionâi, a meti i insegnants di lenghe furlane intes cundizions di confrontâsi sot dal pont di viste culturâl e in maniere professionâl cui coleghis de proprie scuele, cun chei di altris contescj minoritaris in Italie e in Europe, e ancje cun ducj i interlocutôrs interessâts ai problemis de didatiche e de educazion. Dut chest cul fin di formâ insegnants di lenghe furlane bogns di promovi l’aprendiment de lenghe minoritarie intal cuadri di une educazion plurilengâl.

La ARLeF e davuelç compits di direzion e di coordenament dal progjet ancje cul supuart dal so Comitât tecnic sientific e e met adisposizion dal Centri lis risorsis economichis che a coventin pal so funzionament e pal disvilup dai tancj programs, leâts soredut ae didatiche inovative e ae formazion. Pal coordenament des ativitâts e pe realizazion dai obietîfspreviodûts dal Protocol, al è stât metût adun un Comitât Tecnic di pueste, cun components che a rapresentin i sogjets aderents, plui trê esperts di dissiplinis che a tocjin lis ativitâts dal Centri che a son nomenâts de ARLeF che e à la presidence di chest comitât.
In dì di vuê il Comitât Tecnic al è componût di: Walter Tomada (President), Elisa Mengato, Patrizia Pavatti, Rosalba Perini e Donato Toffoli

Sede
Docuscuele al à la sô sede dongje de Biblioteche de Societât Filologjiche Furlane, dulà che si è dat dongje za di tancj agns un piçul tesaur di materiâi, di libris e di progjets cun passe un miâr di documents za a disposizion: la ambizion e je chê di fâ cressi ancjemò di plui cheste racuelte cu la poie dai insegnants e di dut il mont de scuele furlane, che e volarà meti a disposizion competencis e creativitât.

  • ATIVITÂTS DAL CENTRI

    Marilenghe te scuele
    Il progjet di educazion linguistiche integrade “Marilenghe te scuele” al è indreçât aes scuelis primariis e al à l’obietîf di disvilupâ lis competencis linguistichis e comunicativis in lenghe furlane.
    Il progjet, cu la Societât Filologjiche Furlane tant che ent principâl, al è stât finanziât de Regjon Autonome Friûl – Vignesie Julie daûr dai fonts pai progjets speciâi pe scuele, cu la colaborazion di cetancj Istitûts dal teritori regjonâl.
    Il progjet si è concretizât inte produzion di modui e di materiâi didatics pal insegnament e sul ûs de lenghe furlane par veicolâ lis dissiplinis curicolârs, doprant la impostazion CLIL, par otignî il dopli obietîf di vê atenzion sedi pe dissipline che pe lenghe veicolâr. La realizazion dai materiâi didatics e je curade di un grup di ricercje fat di docents des scuelis primariis in servizi cun competencis specifichis intal setôr linguistic (furlan) e glotodidatic. A son stâts publicâts cinc volums inte prime anualitât e siet volums inte seconde anualitât, un o plui par ogni classe de scuele primarie, dedicâts a diviersis dissiplinis.
    Marilenghe&Mariscuele
    Al è un seminari formatîf, rivât intal 2018 ae sô cuinte edizion, increditât daûr des liniis vuide dal MIUR 2016-2019, che si fâs ogni an inte Citât di Codroip, in ocasion des iniziativis inmaneadis pe ricorence de Fieste de Patrie dal Friûl (tal mês di Avrîl). Te buinore il seminari al fronte temis di caratar gjenerâl, invezit tal dopomisdì a vegnin proponûts une schirie di laboratoris didatics indreçâts ai docents di lenghe furlane di diferents ordins e grâts.
    Scrivi
    Cors intensîf di lenghe furlane par insegnants di ducj i ordins scolastics (de scuele de infanzie ae secondarie di secont grât). L’obietîf dal cors al è chel di dâ ai docents lis competencis necessariis di gramatiche – fonologjie, morfologjie e sintassi – par podê doprâ in maniere corete la lenghe furlane scrite. La cualitât alte dal percors formatîf proponût e je garantide de docence curade di insegnants une vore preparâts e cun titui academics specifics, che a proponin ancje nozions di storie de lenghe, semantiche, linguistiche comparade e toponomastiche.
    Scuele di Avost
    Summer School di furlan pai insegnants de scuele de infanzie, primarie e secondarie di prin grât, rivade intal 2018 ae sô seconde edizion. Il percors formatîf al è struturât in trê zornadis e al previôt la pussibilitât di sielzi a cualis sessions partecipâ. Il program si struture in lezions frontâls cun docents universitaris esperts e cun professioniscj che a proponin aprofondiments di linguistiche, gramatiche, leterature, didatiche e ativitâts laboratoriâls che a permetin di cognossi e di meti in pratiche metodologjiis inovativis e adatis pes diviersis etâts dai students (art, storie, musiche, tecnichis artistichis, bai tradizionâi, visitis vuidadis tal teritori e elaborazion dai argoments tratâts cun tecnichis inovativis).
    Fruts!
    Iiniziative rivade intal 2018 ae seconde edizion che e previôt la realizazion di laboratoris creatîfs pes scuelis, pai insegnants, pes fameis e pai curiôs… par scuvierzi il mont de ilustrazion e de leture in lenghe furlane. I incuintris a son inmaneâts in colaborazion cu lis bibliotechis, i istitûts comprensîfs, i autôrs, i ilustradôrs e i editôrs dal teritori furlanofon.

  • Par aprofondiments: Visite il sît di Docuscuele

    Imagjins


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304