#PoliticheLinguistiche

Conference di verifiche e di propueste pe lenghe furlane (L.R. 29/2007) – 2017

Intal 2017, al 1n e ai 2 di Dicembar, si è tignude a Udin la seconde Conference regjonâl di verifiche e di propueste su la atuazion de Leç regjonâl 29/2007 (Normis pe tutele, valorizazion e promozion de lenghe furlane). E je la leç stesse a domandâ, tal art. 30, che almancul une volte ogni 5 agns e dut câs no plui tart di sîs mês prime de scjadince de legjislature, il President dal Consei Regjonâl al clami dongje une Conference di verifiche di propueste par aciertâ la atuazion de leç stesse.

La Conference e à il compit di valutâ lis ativitâts di tutele e di promozion fatis intai ultins 5 agns e di proponi, in viste de scriture e de aprovazion dal gnûf Plan gjenerâl di politiche linguistiche (in chest câs pal 2020-2024), gnovis azions buinis pal disvilup de lenghe furlane e pe plene aplicazion de leç.

L’Ufici di Presidence, intune cui cjâfs grup, al à decidût di concentrâ lis ativitâts de Conference su lis cuatri tematichis plui strategjichis pes azions di politiche linguistiche:

  1. planificazion linguistiche (cun riferiment particolâr al PGPL e ai PSPL)
  2. istruzion (scuelis de infanzie, primariis, secondariis, universitât)
  3. aministrazion publiche (aministrazions statâls, regjonâls e locâi)
  4. media (radio, television, stampe, audiovisîfs, internet e gnovis tecnologjiis).

Za intai prins mês dal 2017, l’Ufici di Presidence al à costituît une Cabine di regjie cul compit di viodi di dutis lis fasis di ideazion, organizazion e coordenament de Conference.
Intal mês di Lui dal 2017 a son stâts costituîts cuatri grups di lavôr, un par ogni tematiche, formâts dai puartadôrs di interès principâi dai setôrs cjapâts in considerazion. Ogni grup al jere coordenât di un component dal Comitât Tecnic Sientific de ARLeF, cul compit di organizâ, gjestî i lavôrs e meti jù une relazion su la tematiche specifiche, di presentâ inte prime zornade di Conference.

I grups a àn lavorât lant daûr di un scheme unic, par meti dongje un cuadri esaustîf de situazion di cumò su la promozion dal furlan par ognidun dai setôrs analizâts.
La metodologjie di lavôr e je stade spartide in 5 fasis:

  • racuelte dai dâts sui progjets realizâts intai ultins 5 agns;
  • analisi dai dâts;
  • valutazion des buinis pratichis e des criticitâts vignudis fûr;
  • comparazion fra lis disposizions di leç e la aplicazion efetive des stessis;
  • redazion des propuestis operativis par ativitâts futuris di planificazion linguistiche.

Lis relazions dai grups di lavôr a son stadis presentadis e discutudis dilunc de prime dì de Conference, intant che lis relazions finâls, che a àn tignût cont dal dibatiment, de documentazion e des propuestis mandadis dai citadins, a son stadis presentadis ai 2 di Dicembar inte seconde session dai lavôrs e a son stadis publicadis intai Ats.
Di fat, come previodût de leç, dopo la publicazion in linie des primis relazions dai Grups di lavôr, ancje i citadins a àn podût partecipâ e intervignî aes ativitâts di valutazion e di propueste, traviers la spedizion di un contribût scrit o intervignint ae discussion dilunc dai doi dîs di lavôr de Conference.

La prime des dôs zornadis di vore de Conference regjonâl, che si è fate dongje tal Auditorium de Regjon a Udin, e je stade mandade in streaming sul sît www.fvg.tv e sul canâl 690 dal digjitâl terestri.

Consulte i materiâi

Ogjet Cjale
Ats de II Conference Regjonâl di Verifiche 2017
Program de II Conference Regjonâl di Verifiche 2017
Relazions e Materiâi dai Grups di lavôr
Components dai Grups di lavôr
Cabine di regjie e organizazion Conference

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304