#Editorie #Siencis

Cîl e Tiere

Cîl e Tiere” e je une riviste di divulgazion sientifiche in lenghe furlane, realizade de Societât Sientifiche e Tecnologjiche Furlane in colaborazion cu la ARLeF e cul patrocini dal CIRF, Centri interdipartimentâl pal disvilup de lenghe e de culture dal Friûl.

A son stâts publicâts 4 numars, tra il 2014 e il 2015, tant che suplement al “Gjornâl Furlan des Siencis/Friulian Journal of Science”.
L’editôr al è FORUM Societât editore universitarie di Udin.

“Cîl e Tiere” e propon contribûts di rapresentants autorevui di diviers setôrs sientifics, che a svicinin i letôrs al mont de ricercje, des invenzions e des scuviertis. Si vûl dimostrâ cemût che la dignitât e l’avignî di une lenghe si misurin ancje de sô capacitât di esprimi i concets plui alts, tant che chei relatîfs ae culture sientifiche e tecnologjiche. In chest, la lenghe furlane no à pôre dai confronts. Cheste, anzit, e pues judâ ducj, ancje i zovins, a scuvierzi e incuriosîsi, mostrant cemût che al è naturâl lei e tratâ argoments dal mont sientific, al pâr di cemût che al ven fat de comunitât internazionâl cul ûs dal inglês.

“Cîl e Tiere” e je stade distribuide ancje intai ambients formatîfs, tant che scuelis e universitâts, tant che contribût al lavôr di insegnants, professioniscj e ricercjadôrs interessâts a doprâ il furlan intal lôr setôr di competence.

La Societât Sientifiche e Tecnologjiche Furlane e je nassude intal 2001 tant che associazion indipendente che e da dongje ricercjadôrs, studiôs e professioniscj di diviers setôrs sientifics e tecnologjics, che a àn a cûr la cressite de culture e de lenghe furlane. I fins de Societât, di fat, a son chei di promovi e di disvilupâ la ricercje, la cognossince e la divulgazion sientifiche e tecnologjiche doprant la lenghe furlane.

Detais

Titul: Cîl e Tiere
Sottitul: Divulgazion sientifiche in lenghe furlane
Periodic, suplement al “Gjornâl Furlan des Siencis/Friulian Journal of Science”
Realizazion: Societât Sientifiche e Tecnologjiche Furlane
Redazion: Marzi Strassolt (Diretôr), Lorenzo Marcolini (Vice diretôr), Carlo Morandini (Coordenadôr editoriâl)
Editôr: FORUM, Societât Editore Universitarie di Udin.

Par lei o discjamâ i numars 1, 2 e 3* di “Cîl e Tiere”, jentre tal sît www.siencis-par-furlan.net/cet/

* Il numar 4 nol è stât publicât in linie.

Imagjins


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304