FÛRXFUR – Fûr par Furlan

FÛRXFUR al è un progjet di comunicazion integrade fat de Cooperative di Informazion Furlane e finanziât de ARLeF- Agjenzie Regjonâl pe lenghe furlane. Nassût cul obietîf di rinfuarçâ la presince e l’ûs dal furlan intes manifestazions regjonâls plui impuartantis, al à animât e promovût, intal 2015 e 2016, i avigniments plui cognossûts dal teritori furlan tacant de prime fieste di Vierte fin ai apontaments de fin dal an:
la Fieste di Viarte a Cormons, HomePage Festival a Udin, Sapori Pro Loco a Passarian, la Notte Bianca e Friuli Doc a Udin, Arti&Sapori a Çopule, la Festa della mela a Tumieç, La Giornata Europea delle Lingue, Gusti di Frontiera a Gurize e Suns Europe a Udin.
Chestis manifestazions, organizadis par valorizâ lis particolaritâts de regjon, a riclamin la curiositât e la partecipazion di miârs di personis ancje di fûr regjon che, propit in chestis ocasions, a àn la oportunitât di cognossi il paisaç, la storie, lis tradizions, la art, la enogastronomie, e ancje lis carateristichis linguistichis – sul teritori si fevele furlan, talian, sloven e todesc – che a fasin pardabon unic il F-VJ in Europe.

Il progjet FÛRXFUR promovût de Agjenzie Regjonâl pe Lenghe Furlane, al unìs in maniere positive e sinergjiche la politiche linguistiche cu la promozion dal teritori. Di fat, FûrxFur, cul so tai inovatîf, pe prime volte al met a sisteme une schirie di azions realizadis za in passât par promovi il furlan intes grandis manifestazions ma che, in cheste ocasion, a àn cjatât une formule organiche e di grant impat comunicatîf.

Il progjet al à intindût promovi in marilenghe, in forme continuative e no ocasionâl, i grancj events dal Friûl, furnint ai sogjets promotôrs ancje servizis tant che lis diretis radiofonichis, la gjestion dai social, lis traduzions, la redazion dai comunicâts stampe e la ufierte di spetacui e ativitât di animazion. Cun di plui al à permetût une presince de lenghe furlane plui difondude e incisive cul obietîf di dialogâ cul public di ogni etât traviers une serie di ativitâts a hoc inseridis intal program des grandis manifestazions: apontaments par adults e par fruts cun diretis radiofonichis, concierts di musiche furlane, teatri e cabaret, presentazions di libris, spetacui e leturis animadis par chei plui piçui.

Dal pont di viste de comunicazion e promozion, il progjet FûrxFur al à permetût ai organizadôrs di realizâ in forme bilengâl, furlan – talian, ducj i materiâi promozionâi tant che depliant, locandinis, menûs e programs des variis iniziativis, publicitât sui media (MV, Il Piccolo, Udinese Channel, Telefriuli), spots radiofonics, trasmissions dedicadis su Radio Onde Furlane, ûs dai socialmedia par furlan, segnaletiche e rollup.

Intal cûr des manifestazions la presince di un bancut di FÛRXFUR e de ARLeF e à permetût ae Agjenzie di jessî de sede istituzionâl par lâ fûr sul teritori a contat diret cu la int par promovi lis sôs ativitâts e par distribuî materiâi informatîfs e gadget par grancj e picinins.

  • ATIVITÂTS REALIZADIS

    Fra lis variis ativitâts fatis dal progjet FûrxFur a son di ricuardâ i videos promozionâi e il concors fotografic “+Figoxfurlan” su Instagram che, pe lôr frescjece comunicative si son indreçâts soredut ai zovins: il sproc di chestis ativitâts al è + Figo x Furlan (Plui figo par furlan) a marcâ che il furlan e je une lenghe peade al presint, vive – ancje cool – e distintive sedi dal pont di viste culturâl che identitari.
    Il concors fotografic Plui figo par furlan al previodeve la spedizion di foto o video cun scritis, riferiments e audio in lenghe furlane fats dilunc des manifestazions. In pali i gadgets di FûrxFur (pastei par colorâ, post-it, puarteclâfs cun led, power bank) e lis maiutis cu la scrite +FigoxFurlan.

    Il video promozionâl,Plui figo al pâr furlan, fat di Giorgio Cantoni in colaborazion cu la SAf, par incoragjâ l’ûs dal furlan fra i zovins, al viôt tant che protagonist Daniel Samba, “Il furlan piturât di neri” cussì come che si definìs lui. Rivât dal Camerun, cul so furlan perfet al è deventât di resint il gnûf testimonial de marilenghe, metafore di une integrazion che e passe ancje traviers la lenghe. La lenghe locâl e jude a integrâsi e a fâ grup, inte cuotidianitât e denote origjinalitât e fra i zovins e pues deventâ cool. Il video, condividût sul web ancje dal Messaggero Veneto, al à otignût une vore di sucès cun 48.000 visualizazions e 1355 condivisions.

    Ancje Lodovica Comello, di S. Denêl, la cjantante famose e atore, tant amade des gnovis gjenerazions, si è prestade a fâ un altri video, cheste volte promozionâl di dut il progjet FûrxFur che al è stât doprât sui social e proietât intai bancuts e intes variis manifestazions.

    Un speciâl televisîf di 12 minûts, simpri prodot di Informazion Furlane dentri dal progjet FûrxFur, al è stât mandât su Telefriuli e al à contât al public il diari di viaç a Friûl Doc 2015.

    Dilunc des manifestazions a son stadis fatis ancje: proiezions di cartons animâts La Pimpa e Âf blu; leturis senichis e animadis di S_cûr sotsore, 99 Peraulis, 11 a 0, Lenghe di Glerie; seradis di musiche: conciert di Loris Vescovo, Luna e un Quarto, Leiplessness, Lino Straulino, Aldo Sbadiglio la Famiglia Ananas in Vacanza a Dresda, Martina Iori; proiezions cu la anteprime dal film “Friûl Revolution”. Lis ativitâts di Fûrxfur a son documentadis intal grup facebook FûrXFUR.

Consulte i materiâi

Ogjet Cjale
Invît Conference stampe 2015

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304