Ancje te edizion numar IX dal concors pes scuelis promovût dal Città Fiera “Premia la tua classe“, il premi speciâl de ARLeF in lenghe furlane al à vût une partecipazion une vore positive.
Il teme di chest an “Se jo o fos un sienziât tal gno laboratori o inventarès…” al à stiçât la fantasie e la creativitât di plui di 25 classis des scuelis de infanzie e primariis dal teritori furlanofon, che a àn presentât plui di 130 elaborâts. Dissens, cartelons e temis a son stâts realizâts cun origjinalitât de bande dai fruts, che a àn dimostrât une sensibilitât particolârs tai confronts di tematichis atuâls e impuartantis tant che la sostignibilitât, il rispiet pal ambient e par chei altris.
La rispueste ative a cheste iniziative e dimostre la impuartance di une didatiche orientade simpri di plui bande il plurilinguisim e la multiculturalitât, par permeti aes gnovis gjenerazions di imparâ e di esplorâ il mont cuntune vision internazionâl, cence gjavâ il savê e la culture dal teritori dulà che a son nassûts o a vivin.
Il lavôr de jurie par sielzi i vincidôrs des categoriis in gare (teme e dissen) nol è stât facil, tant che la ARLeF e à ritignût di premiâ ancje altris elaborâts cuntune menzon speciâl.
Ve ca ducj i arlêfs e lis classis premiadis:
VINCIDÔRS
TEME
Tiziano Bulfon
Classe IV B
Scuele Primarie di Maian
Istitût Comprensîf di Maian e Forgjarie
Motivazion: “Il teme al descrîf une invenzion origjinâl e utile, presentade cuntun stîl precîs e tal detai, ma in maniere disinvolte, cuasi tant che chê di un vêr inventôr. L’elaborât al è articolât in maniere corete, cuntune buine capacitât di rielaborazion. Il lengaç doprât al è adat e coerent ae consegne e la paronance de lenghe furlane, sedi tal lessic che te ortografie, e je pardabon alte.”
CARTELON
Classe Grup Grancj – Sez. B
Scuele de Infanzie di Cjiscjerne
Istitût Comprensîf di Basilian e Sedean
Motivazion: “L’elaborât, risultât di une ativitât multidissiplinâr e realizât doprant materiâi diferents, nus mostre cetante creativitât e fantasie che a doprin i fruts tal proponi soluzions origjinâls a problemis dal mont de sanitât, de ecologjie e dal aprendiment scolastic. Tai dissens, insiorâts cun spiegazions par furlan, si viôt une ativitât di grup belançade cul lavôr fat in autonomie, in maniere di podê permeti a ognidun di esprimi la proprie creativitât in libertât.”
MENZONS SPECIÂLS
TEME
Thomas Scarsini
Classe V A
Scuele Primarie “J. Tomadini” di Rualis
Istitût Comprensîf di Cividât
Motivazion: “Creativitât e frescjece no mancjin in chest elaborât, che al è scrit une vore ben, cuntune capacitât di rielaborazion buine. Il lessic doprât al è adat e l’ûs de lenghe furlane al è bon”
FUMUTS
Classe V A
Scuele Primarie “J.Tomadini” di Rualis
Istitût Comprensîf di Cividât
Motivazion: La Jurie e vûl menzonâ l’ûs dal lengaç dal fumut tant che alternative simpatiche presentade tai elaborâts.
DISSENS
Classe Sez. A e B
Scuele de Infanzie di Montenârs
Istitût Comprensîf di Glemone
Motivazion: “I elaborâts a mostrin dute la creativitât dai fruts e la lôr autonomie tal rapresentâ, cun origjinalitât e in maniere individuâl i desideris, culì te forme des invenzions, doprant materiâi e tecnichis artistichis diferentis.”
CARTELON
Classe V
Scuele Primarie “L. Bevilacqua” di Flaiban
Istitût Comprensîf di Basilian e Sedean
Motivazion: “L’elaborât al mostre une ativitât interdissiplinâr siore e ben struturade, dulà che l’ûs de lenghe furlane al descrîf in maniere interessante lis invenzions proponudis.”
