Il gnûf documentari di Marco D’Agostini inte suaze dal Aquileia Film Festival
Lunis ai 2 di Avost dal 2021, aes 21.00, al sarà presentât in anteprime il gnûf documentari in lenghe furlane di Marco D’Agostini, Patriae – Viaç tal Patriarcjât di Aquilee, coprodot di ARLeF, Informazione Friulana e ALL. Il film al è inserît inte suaze de Edizion XII dal Aquileia Film Festival, rassegne internazionâl di cine, art e archeologjie de Fondazion Aquileia.
La pelicule e mostre il viaç di Carolina, une fantate di cutuardis agns che e fâs une ricercje sul Patriarcjât di Aquilee e e racuei sul teritori i passaçs plui significatîfs di plui di trê secui di storie (1077-1420).
La proiezion e sarà in Place dal Cjapitul a Aquilee cun sottitui par talian, e ae fin di cheste, si podarà cjapâ part a un moment di dialic cul regjist Marco D’Agostini e cun Angelo Floramo.
Par cjapâ part ae presentazion e je obligatorie la prenotazion in linie a chest leam: https://bit.ly/2UXikAf
