Miercus ai 2 di Jugn, aes 19.00, li dal Teatri Palamostre di Udin si podarà assisti al progjet inedit dal titul “Mozart Mataran. La freschezza di un monello geniale“. Un spetacul che al segne l’inviâsi de colaborazion tra la Agjenzie Regjonâl pe Lenghe Furlane e la associazion Amici della Musica di Udin, che al savarà regalâ tantis emozions, midiant la union de sonoritât de lenghe furlane cu la intensitât de musiche gjeniâl di Mozart.
La esecuzion des Sinfoniis plui famosis dal gjeni di Salisburc che a àn fate la storie de musiche si alternarà cu la leture des letaris de famee Mozart voltadis in lenghe furlane e scritis propit di lui ae sûr e ai gjenitôrs, e che a segnin un profîl vîf e personâl dal autôr.
Il spetacul al enfatizarà duncje moments di ironie e passion presints tai scrits e te musiche stesse.
Sul palc e sarà presinte la Orchestra Mozart Italia che e sarà direzude dal Mestri Giancarlo De Lorenzi e la vôs e sarà chê di Gianni Nastri.
I biliets a son disponibii al teatri Palamotre, ducj i dîs cun orari 17.30 – 19.30 o pûr al conciert a tacâ des 17.30.
Par altris informazions: 0432 506925
