Dentri a son ancje tancj contignûts extra e un librut in trê lenghis.
Dopo dal sucès televisîf a nivel talian su Rai Storia e di public, in ocasion des proiezions tai cines dal Friûl, cumò “Marcho. L’ultima bandiera” al devente ancje un satûl preziôs.
La gnove iniziative e sarà presentade vinars ai 30 di Mai, aes 17.30, tal spazi bookshop dal Cine Visionario di Udin, cu la presince di Eros Cisilino e William Cisilino, president e diretôr de ARLeF – Agjenzie regjonâl pe lenghe furlane, di Claudio Zorzenon, di Arte Video srl, dal regjist Marco Fabbro e dal storic Alberto Travain.
Il docufilm coprodusût de ARLeF e di Arte Video srl, cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, al sarà duncje a disposizion tai formâts DVD, Blu Ray e Ultra HD Blu Ray. Cheste ultime e je une tecnologjie fra lis plui gnovis, buine di sfrutâ al massim lis potenzialitâts dai televisôrs di ultime gjenerazion, no dome tant che cualitât de imagjin, ma ancje tant che sun.
“Marcho. L’ultima bandiera” al à vint doi premis internazionâi intai Stâts Unîts, fra chescj il Best Historical Film a New York e une Special Mention a San Diego, otignint visibilitât tal circuit IMDb. Un ricognossiment che al contribuìs a infuartî il valôr culturâl e la puartade internazionâl dal progjet.
Dentri dal satûl no saran dome i trê supuarts digjitâi cu la version interie dal docufilm (par furlan, talian e, volint, cui sottitui par inglês), ma a saran ancje contignûts extra une vore interessants: fotografiis di backstage, il trailer dal cine e ancje intervistis a Marco Fabbro (regjist), a Eros Cisilino e William Cisilino (president e diretôr de ARLeF), ai atôrs Paolo Mutti (Marc di Murùs) e Aida Talliente (Catarine Arcoloniane, la sô femine) e a Vincenzo Di Francesco (compositôr des musichis origjinâls che a compagnin lis senis).
Al insiore il satûl ancje un librut trilengâl (par furlan, talian e inglês), curât di William Cisilino, che al contestualize in maniere precise dal pont di viste storic la vicende di Marc di Murùs: ultin puartebandiere dal Stât patriarcjâl di Aquilee e figure emblematiche de resistence ae vuere declarade al Friûl de Serenissime Republiche di Vignesie tor il 1420.
Il librut al conte la storie di Marc, zontant aprofondiments su la tarde Ete di Mieç furlane, su la fin dal Patriarcjât e su la damnatio memoriae imponude de Serenissime. Cun di plui, a son ancje focus dedicâts al Parlament furlan e ae storiche bandiere dal Friûl.