RAI5, il canâl culturâl de emitente radiotelevisive nazionâl, e à sielt propit il spetacul “Maraveis in sfrese” – la produzion ARLeF che e veve sierât la edizion 2019, tant che ultime tape de programazion dedicade a Mittelfest.
E sarà trasmetude sabide ai 27 di Jugn dal 2020, tor lis 19.35.
Musiche, leterature e piture dai plui grancj autôrs furlans dal secul XVI a vuê, a àn componût lis pagjinis intensis dal spetacul. Il so inseriment tal palinsest culturâl dal canâl RAI nazionâl, al conferme il valôr artistic alt e la ricjece di sugjestions che a caraterizin il spetacul, consacrant il valôr de lenghe furlane su la sene nazionâl.
“Maraveis in sfrese” al à metût in sene musiche, cjant, videoart, recitazion e danze intun ecuilibri savi di lengaçs e autôrs diferents.
Sot de direzion artistiche di Marco Maria Tosolini, il conciert “visuâl” al à vût tant che interpretis la Orchestra giovanile Filarmonici Friulani, vuidade dal diretôr Walter Themel, insiemi ae corâl Nuovo Auricorale VivaVoce, direzude di Monica Cesar.
A fâ di cuintripont ae musiche a son stadis lis imagjins des oparis di grancj artiscj furlans, curadis di Federico Màzzolo, salacor ancjemò plui sugjestivis in gracie de prestazion curte ma intense de balarine Matilde Ceron. I tescj dal dramaturc Carlo Tolazzi – interpretâts de atore Chiara Donada – a son stâts il siôr leam naratîf di chest viaç inte miôr art dal nestri teritori.
