Ogni vinars aes 18.30 e in repliche la domenie aes 7.00 e aes 13.00
Dai 9 di Otubar e je in onde la cuinte stagjon di Maman!, la trasmission tv dute par furlan pensade pai fruts e lis lôr fameis.
Condusude di Daria Miani, jentrade aromai tal cûr di ducj i fruts, che e fasarà divertî i plui piçui cun tantis rubrichis divertentis, adun cul so gjat Vigji. Tra lis novitâts di cheste gnove stagjon e je “La Pueste di Maman!”: ducj i fruts a puedin scrivi a maman@tvstar.com par fâ domandis, mandâ i lôr dissens, domandâ dedichis pai lôr amîs. Daria e rispuindarà in trasmission a ogni domande e curiositât. Dongje dai tancj moments di zûc, des leturis educativis e des barzaletis divertentis, la gnove stagjon di Maman! e je siore di maraveôs cartons animâts par furlan, jenfri chescj une grande novitât: Rite & Cjossul, che a contin lis aventuris cuotidianis de piçule Rite e dal so cjanut tant amât.
Maman! e va in onde ogni vinars, aes 18.30, e in repliche la domenie aes 7.00 e aes 13.00, su Telefriuli – canâi 11 e 511 HD.
La trasmission, che e furnìs tancj stimui declinabii ancje intun strument didatic otim, util aes insegnantis de scuele de infanzie e de scuele primarie pal insegnament de lenghe furlane, e je il risultât di une coproduzion ARLeF e Telefriuli.
