Al è in distribuzion gratuite te sede de ARLeF il gnûf calendari di taule dedicât aes 12 minorancis linguistichis dal Stât talian.
Ai 25 di Novembar dal 1999, cu la aprovazion de Leç n. 482 “Normis in materie di tutele des minorancis linguistichis storichis”, la Republiche taliane e ricognosseve dodis minorancis linguistichis.
Par celebrâ i 20 agns de leç 482/99, la ARLeF – Agjenzie Regjonâl pe Lenghe Furlane, e à ideât il Lunari 2020 inte forme di un viaç che, mês par mês, al travierse in maniere simboliche la penisule taliane cu lis minorancis, ricuardant il lôr valôr culturâl e lis lenghis, che a son i custodis principâi de identitât e dal sens di partignince di un popul.
Lis 12 lenghis a son, lis ricuardìn, l’albanês, il catalan, il cravuat, il francês, il francoprovençâl, il grêc, il ladin, l’ocitan e il sart; e lis trê minorancis presintis te nestre regjon: il sloven, il todesc e, clâr, il furlan.
Tal Lunari, ogni minorance e je rindude in maniere simboliche midiant di une detule segnalade ae ARLeF des stessis comunitâts tant che la plui rapresentative e identificative, che e je proponude in lenghe origjinâl adun cu lis traduzions par furlan e par talian.
Stampât intun numar di copiis limitât, il Lunari al è in distribuzion gratuite te sede de ARLeF – vie Prefettura 13 a Udin -, fin che a ‘nd è.
