fbpx

Lenghe furlane: acuardi di colaborazion tra ARLeF e Universitât dal Friûl

La Agjenzie Regjonâl pe lenghe furlane (ARLeF) e la Universitât dal Friûl a àn firmât un acuardi che al viodarà i doi ents colaborâ te organizazion di cors di formazion e inzornament e te realizazion e publicazion di tescj e di struments didatics par imparâ la lenghe furlane cul fin di preparâ ducj chei che a àn voie di otignî la certificazion linguistiche de lenghe furlane.

Par realizâ lis ativitâts programadis pal 2020/22, la ARLeF e met a disposizion de Universitât dal Friûl un finanziament totâl di di 65 mil euros. Te suaze dal acuardi, l’Ateneu furlan al davuelzarà lis ativitâts di coordenament sientific, aministrativis, organizativis e gjestionâls; la ARLeF e metarà a disposizion lis sôs competencis linguistichis e la sô colaborazion pe metude in vore des iniziativis previodudis, cun di plui si ocuparà des ativitâts di promozion, informazion e comunicazion. Tal detai, si intent preparâ test par valutâ i nivei di fâ in linie, une bancje dâts cun esercizis e percors didatics che a compagnin i/lis candidâts/candidais tal percors par rivâ a vê, o par miorâ il nivel dal sisteme di certificazion de cognossince de lenghe furlane.

Daûr di chel che al à declarât ancje il President de ARLeF, Eros Cisilino, la certificazion des competencis linguistichis e je un element di fonde pe metude in vore di une politiche linguistiche organiche, che e da, cun di plui “tal mont dal lavôr, une garanzie des competencis che si àn, conciliant l’incuintri tra domande e ufierte tai setôrs professionâi là che la cognossince dal furlan e je un vêr valôr zontât, tant che par esempli tal cumierç, tai servizis ae persone e tal setôr de salût.”

L’acuardi tra ARLeF e Universitât al jentre intun percors di colaborazion consolidât che al à il fin di realizâ, come che al à ricuardât il Retôr dal Ateneu, Roberto Pinton, i obietîfs origjinaris de Universitât dal Friûl, istituide e volude a fuart ancje tant che strument di svilup e di rinovament dai filons origjinâi de culture, de lenghe, des tradizions e de storie dal Friûl.

Il document al è stât firmâr dal President de ARLeF, Eros Cisilino, e dal Retôr de Universitât dal Friûl, Roberto Pinton, presints William Cisilino, diretôr de Agjenzie, e Fabiana Fusco, delegade dal Ateneu furlan pe inovazion didatiche e pe formazion al insegnament. Al event al à partecipât ancje Enrico Peterlunger, President dal CIRF (Centri interdipartimentâl pal svilup de lenghe e de culture dal Friûl “Josef Marchet”) e Delegât pe promozion de lenghe e de culture furlanis.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304