Vinars ai 9 di Setembar dal 2022, des 16.00, a son dôs lis iniziativis ludichis promovudis de ARLeF li de Cort di Palaç Morpurgo a Udin
Aes 16.00 al sarà Zuìn e imparìn cun Daria Miani de trasmission Maman!, un laboratori pai plui piçui curât de ARLeF e presentât de condutore de trasmission televisive pe infanzie in lenghe furlane. I fruts a podaràn cjapâ part a ativitâts di zûc e didatichis tant che chês proponudis intai episodis de trasmission coprodusude di ARLeF e Telefriuli (canâl 11 dal digjitâl terestri).
Aes 17.00 al sarà presentât Frico-Man, la version speciâl in lenghe furlane dal famôs videozûc vintage Pac-Man. Si podarà zuiâ cun chel in graciis di un cabinât origjinâl dai agns ’80 che al restarà a disposizion di piçui e grancj fin ae fin de manifestazion. Il zûc al propon sedi il famôs protagonist sedi i siei nemîs mortâi: lis fantasimutis Blinky, Inky, Pinky e Clyde, che par furlan a cjaparan il non di Vigjut sedon, Bepi çondar, Catine peteç e Meni jeur.
La simpatiche iniziative, promovude de ARLeF e realizade di Ensoul, e nas par promovi il sît www.ghiti.it, portâl bilengâl (furlan talian) pe infanzie.
