Di vinars ai 7 di Otubar dal 2022, e torne a tacâ la trasmission televisive par fruts in lenghe furlane “Maman!“, coprodusude di ARLeF e Telefriuli.
Lis pontadis de 7e stagjon a laran in onde su Telefriuli (canâl 11 dal Digjitâl terestri) ogni vinars aes 18.30. Lis replichis a vignaran trasmetudis te domenie, aes 07.00 e aes 13.30.
E sarà une edizion siore di rubrichis gnovis dulà che i piçui telespetatôrs, cu lis lôr fameis, a podaran zuiâ e imparâ cu lis lenghis, in primis chê furlane, ma no dome!
Po dopo, zûcs, aventuris, ridadis, tutorials, leturis e cartons animâts: il format, simpri cu la conduzion di Daria Miani in compagnie di tancj altris amîs, al permet ai fruts di imparâ divertintsi e di cressi cu la lenghe furlane e aes fameis di podê contâ suntun program che al stice la creativitât e la curiositât midiant di un metodi ludic e educatîf plurilengâl.
