Il furlan a scuele lu sielzin plui dal 76% dai gjenitôrs. O fevelìn di plui o mancul 40 mil arlêfs des scuelis de infanzie, primariis e secondariis di prin grât che, ogni an, a imparin la lenghe e la culture furlane, une vore dispès cun metodologjiis didatichis di avanvuardie, tant che il CLIL. Lis fameis si dimostrin duncje simpri plui sensibilis ae tematiche, ancje in
graciis di une cussience incressude su cetancj che a son i vantaçs cognitîfs, sociâls e culturâls di une educazion plurilengâl.
Propit par sostignî la valorizazion de lenghe furlane in ambit scolastic, e va indevant cence polse la ativitât de ARLeF che in chestis setemanis e à consegnât materiâl didatic a supuart de ativitât dai docents intai plui di 330 ples scolastics dulà che si insegne il furlan (scuelis primariis, secondariis e de infanzie).
«La distribuzion dai materiâi a ducj i Istitûts dal teritori furlan e vûl ufrî un supuart impuartant ae ufierte formative dai docents e duncje stimolâ la creativitât, l’interès e l’ûs atîf de lenghe furlane dai arlêfs.
La iniziative e ven daûr ae creazion, tal mês di Març stât, de “Rêt dai referents pal insegnament de lenghe furlane” – che vuê a son 55 – promovude propit de Agjenzie cun chê di facilitâ la distribuzion smirade di materiâl ludic didatic aes scuelis. Chest dut câs nol è l’unic obietîf de Rêt, stant che midiant di jê si podaran ancje ricevi consulencis
linguistichis e didatichis, rindi plui facil il scambi di informazions, il confront e la condivision di progjets leâts ae lenghe furlane.
Il materiâl didatic consegnât, diversificât daûr dai ciclis scolastics, al è stât prontât par ogni insegnant di furlan su la fonde dal numar dai dâts inviâts, tai mês passâts, dai stes Istitûts.
Cun di plui, al è stât metût a disposizion altri materiâl dedicât par ogni classe de Scuele de Infanzie.
La ARLeF e consegne gnûfs materiâi didatics pai docents di furlan
