fbpx

Fieste de Patrie dal Friûl tal Città Fiera

Al è tornât ancje pal 2019 l’apontament cu la “Fieste de Patrie dal Friûl” tal Città Fiera. Une iniziative rivade ae seconde edizion che e ponte a valorizâ lis origjins, la culture e la storie di autonomie dal popul furlan.

Une anticipazion de iniziative si è viodude za miercus ai 3 di Avrîl, cu la scree di un percors espositîf realizât in colaborazion cu la ARLeF e cu la Societât Filologjiche Furlane, prontât tal prin plan dal centri comerciâl. A dâ il bon acet ae cerimonie di inaugurazion al jere presint Antonio Maria Bardelli, president dal Gruppo Bardelli. Adun cun lui, il president de ARLeF, Eros Cisilino, e Carlo Venuti, vice president pal Friûl Centrâl de Societât Filologjiche Furlane.

Une mostre uniche e à dât il benvignût cun doi percors: il prin al è chel di “Furlan, lenghe de Europe”. Curade di William Cisilino e promovude de ARLeF (Agjenzie Regjonâl pe Lenghe Furlane), cul finanziament de Regjon Friûl – Vignesie Julie, la esposizion, che e je za stade ospitade in cetantis sedis in Europe e in Italie, e met in evidence la identitât, la storie e i caratars socioculturâi dal Friûl, esaminant in particolâr il teme de lenghe furlane e des politichis metudis in vore pe sô promozion.

Il secont percors espositîf al jere promovût de Societât Filologjiche Furlane e dedicât a “Friûl (in)Storie”, un progjet che al ponte a pandi la cognossince de identitât furlane, cuntune atenzion particolâr ai moments fondamentâi de sô storie.

Sabide ai 6 di Avrîl, la zornade e je stade dute dedicade a celebrâ la Fieste de Patrie tal Città Fiera. In particolâr tal dopomisdì, il Spazio Show Rondò al è stât animât di une vore di ativitâts: events musicâi, e tra chescj la esibizion dal rapper DJ Tubet; leturis e zûcs pai plui piçui cu la presince di Daria Miani, la amade condutore di Maman!, la trasmission TV in lenghe furlane pai fruts; cors di dissen sui “Gnognosaurs” cul fumetist “Dree” Venier e aprofondiments culturâi pai adults. La ARLeF e jere presinte cuntun so bancut informatîf e promozionâl, invezit la editorie pe infanzie in lenghe furlane e à presentât lis publicazions plui gnovis. Cun di plui, sabide ai 6 e di domenie ai 7, tal Cine Città Fiera e je stade la proiezion di “Facchin Center”, la gnove serie dai ideadôrs di “Tacons” e di “Felici ma furlans”.

La mostre “Furlan, lenghe de Europe” e je ancjemò vierte al public, tal orari dal centri comerciâl, al prin plan – Aree Verde.

Date de Iniziative: Avrîl 2019

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304