La edizion numar 49 de Fieste de Patrie dal Friûl e je stade la prime “itinerante”: di fat, e à puartât i partecipants prime a Dartigne e dopo a Montenârs, “cjase” di pre Checo Placerean; il public al è stât acompagnât in doi lûcs che a son un simbul de pedemontane furlane, tal 50m inovâl dal taramot che al à tibiât il Friûl.
Doi i moments cetant significatîfs, a tacâ de consegne di une targhe al retôr de Universitât dal Friûl, Angelo Montanari, de bande de ARLeF: un ricognossiment pal rûl fondamentâl che l’ateneu furlan al à vût tal percors di rinassite dopo dal taramot dal 1976. Un at di fuart valôr simbolic che e al à volût ricuardâ che la Universitât e je nassude de volontât dal popul furlan, deventant, dilunc dal timp, un presidi de identitât e de culture furlane, cemût che al è ripuartât propit inte targhe.
Chest an, la Fieste de Patrie dal Friûl – che e à celebrât i 949 agns dal Stât Patriarcjâl (ai 3 di Avrîl dal 1077) – e je stade organizade dai Comuns di Dartigne e di Montenârs, cu la poie de Regjon Autonome Friûl-Vignesie Julie e de ARLeF – Agjenzie regjonâl pe lenghe furlane, in colaborazion cul l’Istitût Ladin Furlan “Pre Checo Placerean”. L’event al è tacât a Dartigne cu la esposizion tradizionâl de bandiere dal Friûl, acompagnade de “Filarmonica Luigi Mattiussi” direte dal Mestri Herbert Fasiolo. Dopo, il corteu si è mot fin te glesie de Nativitât di Sante Marie pe Messe in lenghe furlane: e je stade celebrade dai rapresentants des trê diocesi dal Friûl, cun leturis e preieris ancje par sloven e todesc, e cul acompagnament dal “Grup Corâl Spengenberg” di Spilimberc.
La matinade e je lade indevant in place Marnì cu lis danzis e i colôrs dai Balarins de Riviere, fin ae celebrazion civîl tal Gnûf Teatri Bonsignôr Lavaroni, cu la leture de Bole imperiâl acompagnade dal Grup storic “Il Barbacane” e i tambûrs de “Cucurbite sonorae” di Vençon.
Po dopo, al è stât il moment dal scambi tradizionâl de bandiere tra Carlo Spagnol, sindic dal Comun di Sacîl – che al veve organizade la manifestazion tal 2025 – e i rapresentants dai doi Comuns promotôrs chest an: il sindic di Dartigne, Alessandro Marangoni e la vicesindiche di Montenârs, Annalisa Zanitti.
Inte cerimonie civîl, dopo dai discors di Marangoni e Zanitti, a son intervignûts: Geremia Gomboso, president dal Istitût Ladin Furlan; Walter Bandelj, president SSO Svet Slovenskih Organizascij; Alfredo Sandrini president dal Kanaltaler Kulturverein; Dorino Favot, president de ANCI FVG – Associazione Nazionale Comuni Italiani; Monica Feragotto, conseire de ACLiF Assemblee de Comunitât Linguistiche Furlane; Angelo Montanari, retôr de Universitât dal Friûl; Eros Cisilino, president de ARLeF; la depudate Isabella De Monte; l’europarlamentâr Anna Maria Cisint; Manuele Ferrari, conseîr dal Consei Regjonâl F-VJ; Barbara Zilli, assessore aes financis de Regjion Autonome Friûl-Vignesie Julie.
In plui, a jerin presints i Conseîrs regjonâi Markus Maurmair, Elia Miani, Massimo Moretuzzo e Serena Pellegrino; Maurizio Negro, assessôr dal Comun di Gurize; Federico Pirone, assessôr dal Comun di Udin; il president di Ent Friûl tal Mont, Franco Iacop; il president dal Teatri Stabil Furlan, Lorenzo Zanon; la rapresentante dal Uffici Scolastic Regjonâl, Donatella Mosenghini, e tancj sindics e rapresentants dai Comuns furlans e dai
Comuns furlanofons dal Venit.
A dâ inmò plui valôr ae cerimonie e je stade la proiezion, in esclusive, dal video curât dal Istitût Ladin Furlan “Pre Checo Placerean” che al ufrìs une version gnove dal imni dal Friûl “Incuintri al doman”: la interpretazion folk rock dai “Corte di Lunas” e la regjie di Marco Fabbro a àn puartât il public tes atmosferis di fieste medievâls.
Il secont video che al è stât proietât al è di un altri gjenar: protagoniste Desiree Chiappo Debegnach, dal innomenât canâl YouTube “YoupalTubo“, “interogade” sul “Parcè che il Friûl si clame Patrie” di Marco Del Ben, plui cognossût cul sorenon “Marcutti”. I presints a àn podût preseâ ancje un videoclip che al à mostrât cualchi “Acuile in Comun“, tra lis tantis acuilis che a son stadis picjadis tes façadis esternis dai palaçs dai 130 Comuns che a àn aderît al progjet, che al jere stât inviât te Fieste de Patrie dal 2025. La iniziative, promovude de Regjon Autonome Friûl-Vignesie Julie e de ARLeF, e à l’obietîf di valorizâ e di promovi la identitât furlane.
Ancjetant significatîf al è stât il moment dedicât a rimarcâ il valôr des variantis linguistichis dal furlan: a rapresentin pe lenghe une ricjece in plui, e si àn di mantignî. Su chest e je intervignude la siore Annamaria De Monte, une fie vere di Dartigne, che e à testemoneade la variante locâl tipiche cu la “e”. La siore e à ricuardât cemût che chê variante e sedi la espression autentiche de ricjece culturâl dal teritori e cemût che, par chest, e à di jessi valorizade e soredut tramandade aes gnovis gjenerazions.
Finidis lis celabrazions, la zornade e je lade indevant a Montenârs cuntun moment di condivision che al à vût tant che protagonist Dario Zampa. Tal dopomisdì invezit a son tornâts ducj a Dartigne par une interessante cjaminade storiche e archeologjiche, par cure de cooperative Riscoperte.
