Tal 2021, la Fieste de Patrie dal Friûl, rivade ae sô 44e edizion, e je stade a Udin in dôs ocasions.
Tal mês di Avrîl e varès vût di davuelzisi cun tantis iniziativis culturâls, ma par vie de emergjence sanitarie, si à sielt di rimandâ a Setembar lis iniziativis in program.
Ai 3 di Avrîl, duncje, il Comun di Udin e la ARLeF a àn organizât une cerimonie simboliche, cu la presince dal president dal Consei regjonâl Piero Mauro Zanin, de assessore aes financis Barbara Zilli, di Markus Maurmair, president de Assemblee di Comunitât Linguistiche Furlane e dal sindic di Udin Pietro Fontanini e il president de ARLeF Eros Cisilino.
Lis autoritâts si son cjatadis prin sul plaçâl dal Cjistiel di Udin pe esposizion de bandiere su la specole e po si son spostadis tal salon dal Parlament.
Ai 12 di Setembar, in ocasion di Friuli Doc, la Fieste de Patrie dal Friûl si è celebrade in presince. Lis celebrazions uficiâls a son tacadis cu la esposizion de bandiere dal Friûl su la specole dal Cjistiel di Udin, intant che in place Libertât il grup bandistic “Società Filarmonica di Pozzuolo del Friuli” al sunave l’imni uficiâl dal Friûl “Incuintri al doman”. Po dopo, lis autoritâts a àn fat omaç ae antighe bandiere dal Friûl tal Museu dal Domo.
Aes 10.30, in Domo, i delegâts des diocesi di Gurize, Pordenon e Udin a àn celebrade la messe par furlan, cun leturis e preieris ancje par sloven e todesc. Al à acompagnât la celebrazion il côr “Cappella Musicale” dal Domo di Udin.
Plui tart, sul teraplen di Place Libertât, si è davuelte la Cerimonie civîl cu la esecuzion dal imni uficiâl dal Friûl “Incuintri al doman” di bande dal grup ArteVoce Ensemble. Subit dopo si è fat il scambi de bandiere, consegnade dal vicesindic di Gurize, che e veve ospitade la Fieste de Patrie dal 2019, al sindic dal Comun di Udin, tant che testemoni ideâl dal passaç de Fieste di un Comun a chel altri. Po dopo e je stade lete la Bole dal imperadôr Indrì IV, l’at fondatîf de Patrie dal Friûl.
La cerimonie e je stade ancje la ocasion par premiâ i vincidôrs dal concors “Emozions furlanis in viaç pal teritori”, promovût dal Ufici Scolastic Regjonâl e de ARLeF e indreçât aes scuelis de infanzie, primariis e secondariis di prin grât.
L’event si è sierât cu la proiezion dai videos “Lamps di Friûl”, realizâts dai fruts dai Centris Estîfs dal Comun di Udin.
La celebrazion e je stade organizade dal Comun di Udin, cu la poie de Regjon Friûl-Vignesie Julie e de ARLeF, in colaborazion cul Istiût Ladin Furlan “Pre Checo Placerean”; dal 2015, la manifestazion e je ricognossude in maniere uficiâl de Regjon F-VJ cu la L.R. 6, par ricuardâ e valorizâ lis origjins, la culture e la storie di autonomie dal popul furlan.
Fotos di Luca Laureati
Date de Iniziative: Setembar 2021
Imagjins
