Fieste de Patrie dal Friûl 2019, Gurize – ai 7 di Avrîl

Gurize e je stade sielte tant che sede de Fieste de Patrie dal Friûl 2019, 942 agns dopo de nassite dal Stât patriarcjâl furlan.

L’event al è programât par domenie ai 7 di Avrîl, cuant che i partecipants si cjataran in Plaza Granda (Place Vittoria), aes 9.45, par assisti ae esposizion de bandiere dal Friûl. L’acompagnament musicâl al vignarà fat dal Grup bandistic “Tita Michelàs” di Flumisel, direzût dal mestri Giorgio Cannistrà. Dopo, la bande e acompagnarà il corteu fin te Glesie di San Roc (in Place San Roc), dulà che i delegâts des trê diocesis di Gurize, di Udin e di Pordenon a celebraran la messe par furlan cun leturis e preieris ancje par sloven e par todesc. La celebrazion e sarà acompagnade de Corâl parochiâl “Santa Lucia” direzude di Giada Piani.

Po dopo e sarà la cerimonie civîl, li de sale “Incontro” de parochie di Borc San Roc (daûr de glesie). L’event al scomençarà cul imni uficiâl dal Friûl “Incuintri al doman”, sunât dal cuintet feminin ArteVoce Ensemble; subit daûr al sarà il sgambi de bandiere dal Friûl che e vignarà consegnade al sindic di Gurize di un rapresentant dal comun di Voleson Darzin, che al veve ospitade la Fieste intal 2018. E sarà dade po dopo leture de bole dal imperadôr Indrì IV, che e rapresente l’at di fondazion de Patrie dal Friûl, e daûr al vignarà il salût des autoritâts.

La cerimonie e sarà ancje la ocasion par premiâ lis scuelis de infanzie, primariis e secondariis di prin grât che a àn vint il concors a premis “Emozions furlanis in viaç pal teritori”, promovût dal Ufici Scolastic regjonâl adun cu la ARLeF, che al è rivât ae otave edizion. L’event si sierarà cui tedofars de Stafete pal Friûl, partide a buinore di Marian, che a rivaran in sale par consegnâ in maniere simboliche al sindic di Gurize la bole imperiâl che lis scuadris partecipantis – un centenâr di coridôrs – si son scambiadis tant che testemoni.

Cui che nol podarà partecipâ ae Fieste, al podarà cjalâ la direte de trasmission “Il Campanile della Domenica”, in onde su Telefriuli, canâl 11, tacant des 11.30.

Il ristorant “Ai tre soldi goriziani”, al propon un menù tipic convenzionât pai partecipants ae Fieste. La prenotazion e je obligatorie dentri dai 5 di Avrîl, tel. 0481 531956.

Cun di plui, dopomisdì a son programadis lis visitis vuidadis gratuitis ae sinagoghe e al Ghet ebraic. Si cjatisi aes 15 e aes 15.45 (denant di Cjase Ascoli, vie Ascoli, 1). Al covente però prenotâ dentri dai 3 di Avrîl, contatant il Sportel Regjonâl pe Lenghe Furlane – Friûl Orientâl, tel. 0481 383451, email: orient@sportelfurlan.eu

Come ogni an, lis celebrazions de Fieste dal Friûl a son inricjidis di un calendari impuartant di events promovûts dai comuns che a àn aderît al bant promovût de ARLeF, in atuazion de Leç n. 6/2015 pe poie aes manifestazions culturâls che a acompagnin la ricorence: discuvierç il program detaiât dai events organizâts in dut il Friûl.

Date de Iniziative: Març 2019

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304