Ai 12 di Setembar dal 2021 a son stadis premiadis lis scuelis che a àn partecipât ae X edizion dal concors “Emozions furlanis in viaç pal teritori”, bandît dal Ufficio Scolastico Regionale, dutun cu la ARLeF e la ex Provincie di Udin, par valorizâ e promovi il patrimoni storic, artistic, culturâl e naturâl dal Friûl. Dal 2015, lis premiazions dal concors si tegnin in ocasion dal aniversari dai 3 di Avrîl, Fieste de Patrie dal Friûl.
Il concors al è viert aes scuelis de infanzie, primariis e secondariis di prin grât des ex provinciis di Gurize, Pordenon e Udin.
Ogni an lis scuelis vincidoris a puedin gjoldi di un premi in bogns pal acuist di materiâl didatic, metûts a disposizion de ARLeF, e di diviers imprescj e jutoris didatics in lenghe furlane.
I vincidôrs de edizion 2021 dal concors a son:
la scuele di Lignan, pe sezion Infanzie, cu la motivazion: “Un biel progjet didatic multidissiplinâr che, midiant dal personaç vuide di Mariutine, al stimole il plurilinguisim dai fruts. La lenghe furlane e je doprade in maniere origjinâl par presentâ concets gnûfs e par insiorâ l’aprendiment des ativitâts di ogni dì”;
la scuele “Cristoforo Colombo” di Pantianins, pe sezion Primarie, cu la motivazion: “Cun chest progjet, i fruts a àn inventade une storie che e tocje temis sociâi impuartants, tant che la amicizie, la diversitât, il bulisim e il rispiet, no dome par chei altris, ma ancje viers la nature e il mont. A àn dimostrât sensibilitât e atenzion pe sostignibilitât e pe tutele dal nestri teritori”;
la Rêt di scuelis “Collinrete”, pe sezion Secondarie di prin grât, cu la motivazion: “Un progjet che al met adun lis tantis ativitâts di dutis lis scuelis de rêt. Al è un grant lavôr di colaborazion, che al stice ducj i arlêfs a condividi lis informazions des diviersis comunitâts e lis lôr passions e curiositâts midiant di storiis, zûcs, articui, poesiis… il dut doprant la lenghe furlane!”
Stant che tancj lavôrs a jerin une vore meritevui, la jurie e à decidût di segnalâ ancje chestis scuelis pal lôr impegn:
Pe sezion Infanzie, la scuele “Maria Forte” di Avile di Buie.
Pe sezion Primariis, la scuele “Collegio della Provvidenza” di Udin.
Pe sezion Secondariis di prin grât, la scuele “Jacopo Pirona” di Paulêt e la scuele “Pellegrino da San Daniele” di San Denêl.
Consulte i materiâi
| Ogjet | Cjale |
| I vincidôrs des edizions passadis dal Concors |
|
Imagjins
