A intonâ la gnove version a son stadis lis vôs blancjis di “VocinVolo – Ritmea” direzudis di Lucia Follador e acompagnadis al piano di Alessio Domini
Ogni an, in ocasion de Fieste de Patrie dal Friûl, si pues gjoldi di une gnove version dal Imni uficiâl dal Friûl “Incuintri al doman“. E ogni an la anime dai furlans e je cjapade di une emozion gnove.
Nancje il 2023 nol fasarà ecezion. Al è tacât il cont par ledrôs pes celebrazions uficiâls de edizion numar 46 de Fieste, in program ai 16 di Avrîl a Caprive.
La ARLeF e à finanziât, adun cu la Regjon Autonome Friûl-Vignesie Julie, chest gnûf progjet promovût dal Istitût Ladin Furlan “Pre Checo Placerean”.
Il protagonist de clip al è il côr di vôs blancjis “VocinVolo – Ritmea” di Udin, direzût di Lucia Follador. Il sun limpi des vôs des frutis e dai fruts al è acompagnât des notis dal piano, sunât cun bravure di Alessio Domini. La ambientazion sielzude par cheste version di “Incuintri al doman” – di ispirazion plui classiche a pet di chês altris – e je Vile Gallici Deciani, a Montegnà di Cjassà. La residence storiche e mostre dute la sô bielece, cjapant dentri – tant che un satûl preziôs – lis musichis scritis di Valter Sivilotti e lis peraulis di Renato Stroili Gurisatti. Un video delicât e elegant, cu la regjie firmade di Giorgio Milocco – Quasar.
La Fieste de Patrie dal Friûl e je stade ricognossude de Regjon in forme uficiâl intal 2015, e chest an e sarà organizade dal comun dal Friûl Orientâl, in gracie de poie de Regjon Autonome Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean”.
E je, e e sarà, ancje intal 2023, la ocasion par celebrâ, in comunitât, i
valôrs culturâi e linguistics là che il popul furlan si ricognòs ogni dì e che midiant di chei al aferme la sô identitât. Parcè che la Fieste, di là di ricuardâ lis origjins de Patrie dal Friûl (fondade ai 3 di Avrîl dal 1077), e fâs propit chest, fin de sô prime edizion celebrade a Aquilee intal 1977 su iniziative di pre Checo Placerean: e celebre la identitât dai Furlans, in Patrie e ator pal mont.
Consulte i materiâi
| Ogjet | Cjale |
| Cjale il video |
|
