fbpx

Incuintri al doman

Un dron, che o podìn imagjinâ tant che une acuile in svol, al racuei la schirie di imagjins dal Friûl che a acompagnin lis notis di “Incuintri al doman”, l’imni dal Friûl interpretât des cuatri cjantantis furlanis Consuelo Avoledo, Michela Franceschina, Jessica Interdonato e Giulia Polidori di ArteVoce Ensemble.

Cun chest gnûf video musicâl, la ARLeF-Agjenzie Regjonâl pe Lenghe Furlane e l’Istitût Ladin Furlan a celebrin la ricorence dai 3 di Avrîl, Fieste de Patrie dal Friûl. Un video di grant incjant là che, in mancul di doi minûts, la Patrie furlane si mostre in dute la sô bielece di nature, stagjons, citâts, borcs e storie, intant che lis zovinis cjantantis di ArteVoce Ensemble a fasin rivocâ peraulis e musichis che a emozionin pardabon.

Aquilee, Cividât, la Crete dal Crostis, Nert, Frisanc, Gurize, la Isule des Capis e la Isule di Sant Andree (Maran), Palme, Pordenon, Rutârs, Sauris Disore, Udin, Vençon, la Mont di Muris e il Colians a son il piçul compendi dal Friûl che al passe intes imagjins filmadis dal dron, insiemi cu lis peraulis di Renato Stroili Gurisatti e cu lis musichis origjinâls dal famôs compositôr furlan Valter Sivilotti, tornadis a rangjâ pe ocasion dal musicist Geremy Seravalle.

Par visualizâ il video, cliche culì

Chestis lis peraulis dal imni

In alt o fradis, / o int di Aquilee, / devant da la Storie, / di front dal doman. / Sin flame ch’e vîf / pes stradis dal mont / sin non di une Patrie / sin fîs dal Friûl. // Scolte o Friûl, / o tiere di libars, / di lenghis e popui / sês cjase di pâs. / Dai secui i paris / nus clamin adun / a fâsi lidrîs di unic destin. // In alt o Friûl, / o Patrie mê sante, / di fuarce e sperance / si viest la tô int. / Un popul sigûr / ch’al cjamine te lûs / incuintri al doman, / incuintri ai siei fîs.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304