In memorie di Beltram

A 675 agns de sô muart, la ARLeF, adun cui Comuns di Martignà e di San Zorç da la Richinvelde e cul Fogolâr Civic, a inmanein trê dîs di events, dai 6 ai 8 di Jugn, par ricuardâ une figure clâf de storie furlane.

A 675 agns de sô muart tragjiche, capitade ai 6 di Jugn dal 1350 a San Zorç da la Richinvelde intune conzure metude sù di cualchi nobil furlan, si rinove la memorie di un dai protagoniscj plui innomenâts e amâts dal Patriarcjât di Aquilee: Beltram di Saint Geniès.

Par celebrâ la figure di chest riformadôr eclesiastic, diplomatic e om di culture, tant cjâr al popul furlan, dai 6 ai 8 di Jugn dal 2025, a Martignà, Sant Zorç da la Richinvelde e Udin, a son in program une schirie di events par memoreâlu, inmaneâts dal Comun di Martignà, dal Comun di San Zorç da la Richinvelde e dal Fogolâr Civic di Udin, cu la colaborazion de ARLeF.

Lis iniziativis a rapresentin une ocasion preziose par tornâ a scuvierzi lis lidrîs e par onorâ une figure che e à segnât in maniere profonde la storie dal Friûl.

Il Patriarcje Beltram al è forsit chel plui amât e chel plui cognossût dai furlans. De sô figure nus colpìs la indurance, la energjie (cundut de etât), la laboriositât e la capacitât di savê dialogâ cu lis diviersis classis sociâls. Sot de sô vuide, il Patriarcjât di Aquilee al à tocjât nivei une vore alts par chei timps, sedi tant che rapresentance sociâl, midiant di riformis istituzionâls inovativis, che tant che autorevolece internazionâl, in graciis des sôs grandis capacitâts diplomatichis e militârs. Une des carateristichis principâls di Beltram e je stade la caritât bande di chei mancul fortunâts, une costante di dut il so mandât ancje intai moments mancul facii. Tant che promotôr des arts, al è in graciis di lui se vuê o identifichìn la acuile dorade intal cîl celest tant che nestre bandiere.

---

IL PROGRAM DES CELEBRAZIONS

MARTIGNÀ

• Vinars ai 6 di Jugn: aes 18.30, inte biele suaze de Glesie di Faugnà, il storic e scritôr Agnul Floramo al compagnarà il public intun “Viaç inte Ete di Mieç”, contant la storie dai Patriarcjis di Aquilee. Subit daûr, Daniele Bertossio al presentarà “La nature ator di nô”, un aprofondiment su la biodiversitât dal Parc dal Beât Beltram. L’intervent al spiegarà cemût che e ven monitorade la faune locâl e lis iniziativis di tutele ambientâl ativis sul so teritori. La jentrade e je libare.

• Sabide ai 7 di Jugn: a Narêt di Prât, des 16.00 indenant, e je in program une cjaminade naturalistiche tal Parc dal Beât Beltram par cure di Daniele Bertossio (si cjatisi dongje de jentrade dal Parc). Aes 17.30, li de Crôs dal Beât Beltram, il professôr Alberto Travain al proponarà une riflession su “Vite e mît dal Beât Beltram”. Subit daûr, aes 18.30, e sarà la celebrazion de Sante Messe, simpri tal stes puest. I events a saran vierts a ducj e nol covente notâsi prime.

SAN ZORÇ DA LA RICHINVELDE

• Sabide ai 7 di Jugn: aes 20.30, inte Gleseute di Sant Nicolau, si presentarà il libri “Fantasticant” di pre Antoni Beline. A intervignaran pre Romano Michelot, president di Glesie Furlane, che e da il so patrocini al event, cun leturis par cure des poetis Luigina Lorenzini e Alida Pevere. Ancje chest apontament al è cun jentrade libare.

• Domenie ai 8 di Jugn: si celebrarà la Sante Messe intai Prâts dal Beltram, aes 9.00 par talian e aes 10.30 par furlan, e dopo si larà in procession fin là dal clap comemoratîf. Tal câs di brut timp, lis messis si disaran inte glesie parochiâl di Sant Zorç Martar, in place Beât Beltram.

UDIN

• Vinars ai 6 di Jugn: aes 19.00, tal Domo di Udin e sarà la celebrazion de Messe cjantade cul côr de Associazion musicâl “Bertrando di Aquileia” di San Zorç da la Richinvelde, in colaborazion cul Comun di San Zorç da la Richinvelde.

• Sabide ai 7 di Jugn: aes 11.00, tal Museu dal Domo e je in program la visite vuidade “Ae scuvierte des oparis di art dal Beât Beltram”. La iniziative e je curade dal Circul Culturâl Beât Beltram di Martignà, in colaborazion cul Comun di San Zorç da la Richinvelde e cul Museu dal Domo. Informazions e prenotazions al numar 338 4051342.

• Domenie ai 8 di Jugn: aes 18.00, da pît de storiche Loze dal Lionel, si davuelzarà il Pali des rosis o dal Beât Beltram, par cure dal Fogolâr Civic di Udin. Si trate di un pali di tîr al bersai cun arc e balestre, che al puarte di gnûf in vite il spirt comunitari e de Ete di Mieç dai timps dal Patriarcje.