Pal secont an, in graciis de colaborazion rinovade tra la Legjon dai Carabinîrs “Friûl-Vignesie Julie”, la ARLeF e la Regjon Autonome Friûl-Vignesie Julie, al è stât presentât il Calendari storic de Arme dai Carabinîrs in lenghe furlane.
Il “Calendari storic de Arme dai Carabinîrs 2024” in lenghe furlane, che si zonte a chês altris 9 lenghis (inglês, francês, todesc, spagnûl, portughês, gjaponês, cinês, arap e sart) che al è stât voltât chest calendari, al è dedicât al teme “I Carabinîrs e lis Comunitâts” e, in particolâr, ae figure dal Carabinîr tant che pont di riferiment de coletivitât. La vicinance, la capacitât di contat e di scolte, lis tantis atenzions, piçulis e grandis, ai bisugns des personis, des citâts metropolitanis fint ai borcs plui lontans di provincie, là che i Carabinîrs a rispuindin aes istancis particolârs di confuart sociâl di ogni comunitât, a son il fîl ros che al caraterize di simpri il lavôr de Arme e che nus acompagne par dutis lis 12 contis dal Calendari 2024.
Lis storiis, descritis de pene di Massimo Gramellini, a contin, cun figurazions realizadis dal Studio Design Pininfarina, cualchidune des impresis plui eroichis e altris che a àn plui a ce fâ cu la vite di ogni dì.
La edizion 2024 dal Calendari dai Carabinîrs in lenghe furlane al marche duncje il leam fuart dal cuarp dai Carabinîrs cul teritori e la lôr atenzion tai confronts de sô popolazion. Dut chest al fâs in maniere che cheste publicazion e sedi ancjemò plui preseade e e rint onôr al furlan, tant che lenghe ricognossude in maniere uficiâl dal Stât talian.
