La nomine di Gurize (adun cun Nova Gorica) a Capitâl Europeane de Culture 2025 al è un travuart storic pal popul furlan.
La ARLeF si complimente e si met daurman a disposizion de citât par contribuî a valorizâ la sô vocazion pluriculturâl. Une colaborazion che o metìn in cjamp no dome tant che Agjenzie Regjonâl pe Lenghe Furlane, ma ancje tant che vicepresidence dal NPLD, il Network european des minorancis linguistichis cun sede a Bruxelles. Chest ultin rûl nus darà la fuarce par podê impegnâsi a nivel european par valorizâ cheste vitorie simboliche e, cun jê, la identitât multilengâl di Gurize.
Gurize e je la prime citât furlane nomenade Capitâl de Culture e e rapresente la vitorie de anime plui sclete de Europe, chê de pluralitât dai popui e des lenghis. Un risultât straordenari par une citât maraveose, là che ogni dì la int e fevele par furlan, talian e sloven. Al è un sucès che i dâ fuarce al patrimoni storic, linguistic e culturâl che al è la plui grande ricjece dal nestri teritori.
