Al è rivât il moment di iscrivi i fruts a scuele e ancje di fâ sieltis educativis che a promovin il lôr percors di cressite, come la pussibilitât di une didatiche plurilengâl, une oportunitât che tantis fameis dal Friûl a presein aromai di timp.
Dai 13 di Zenâr ai 14 di Fevrâr dal 2026, tal moment de iscrizion ae scuele de infanzie, primarie e secondarie di prin grât, i gjenitôrs a podaran zovâsi dal insegnament dal furlan pai lôr fîs par dute la durade dal cicli scolastic. E je une sielte che ancje l’an passât e à fat il 78% des fameis, segn che e je une grande cussience dai vantaçs cognitîfs, sociâi e culturâi peâts a une educazion plurilengâl, aspiet che la ricercje sientifiche e a za dimostrât a larc. I fruts e lis frutis che a studiin il furlan a imparin cun plui facilitât l’inglês e chês altris lenghis, e a disvilupin abilitâts logjichis matematichis e creativis plui altis.
L’insegnament dal furlan al è di almancul 30 oris di studi par an e nol gjave oris a chês altris materiis. La leç, di fat, e stabilìs che si fasi tal 20% dal curriculum che lis scuelis a fissin in maniere autonome. Par zovâsi di chest insegnament, si à di indicâ la sielte tal moment de iscrizion online sul portâl dal MiM – Ministeri de Istruzion e dal Merit, unica.istruzione.gov.it, tal câs de scuele primarie e di chê secondarie di prin grât, o suntun modul di cjarte tal câs de scuele de infanzie. Cun di plui, lis segretariis dai istitûts a son simpri a disposizion par judâ e furnî sclariments.
Par supuartâ la ativitât didatiche in classe, di cualchi an al è ancje “Anìn!”, il manuâl che al compagne i arlêfs de scuele primarie a scuvierzi la lenghe e la culture furlane. Un invistiment pal avignî de lenghe, promovût de ARLeF e de Regjon Autonome Friûl-Vignesie Julie tal meti in vore il Plan gjenerâl di politiche linguistiche pe lenghe furlane. Il manuâl al è dât fûr sore nuie a ducj i students che a sielzin di imparâ il furlan a scuele: il volum pes classis 1e e 2e al è stât realizât cun chê di svicinâsi in maniere graduâl ae lenghe; chel pe 3e, 4e e 5e, invezit, al va insot te storie e te gjeografie furlanis, te lenghe e te leterature. Dut intune dimension plurilengâl, cu la presince dal inglês e di chês altris lenghis che si fevelin tal teritori regjonâl.
A cui che si domande ancjemò parcè che l’insegnament dal furlan a scuele al sedi une oportunitât, si pues rispuindii che nus al dîs la sience. I studis, di fat, a mostrin che i fruts bilengâi a imparin cun plui facilitât altris lenghis, come l’inglês; a disvilupin une capacitât di aprendiment plui grande e une comprension plui svelte; a àn abilitâts logjichis matematichis e creativis plui altis. Cun di plui, si adatin miôr ai cambiaments, di là di vê une propension plui marcade tal vierzisi bande chei altris.
Infin, no si à di dismenteâ i vantaçs pe salût dal cerviel: cul doprâ plui lenghis si lu manten zovin e agjil, intardant i pericui di demence e Alzheimer. Une risorse cognitive preziose, che al è ben coltivâ fin di cuant che si tache a lâ a scuele.
Consulte i materiâi
| Ogjet | Cjale |
| "Dîs di sì al furlan a scuele par to fi!" |
|
