Une fieste inte fieste, par celebrâ la identitât dal popul furlan
La Fieste de Patrie dal Friûl e torne in presince, domenie ai 12 di Setembar dal 2021, dentri de manifestazion Friuli Doc. E sarà une fieste inte fieste par celebrâ in comunitât i valôrs culturâi e linguistics dal popul furlan e afermâ la sô identitât.
La Fieste e ricuarde za de sô prime edizion, fate a Aquilee tal 1977 par iniziative di Pre Checo Placerean, la nassite dal Stât Patriarcjâl di Aquilee, istituît ai 3 di Avrîl dal 1077; dal 2015 la manifestazion e je ricognossude in maniere uficiâl de Regjon F-VJ, cu la L.R. 6, par ricuardâ e valorizâ lis origjins, la culture e la storie di autonomie dal popul furlan.
Chest an, e je organizade dal Comun di Udin, cu la poie de Regjon Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean”.
Pe zornade dai 12 di Setembar, il program des celebrazions uficiâls al è une vore siôr. Si tache aes 09.45 cu la esposizion de bandiere dal Friûl su la specule dal Cjistiel di Udin. Lis autoritâts a rindaran po dopo onôr ae antighe bandiere dal Friûl, esponude intal Museo dal Domo.
Aes 10.30, in Domo, si celebre la S. Messe par furlan, cun leturis ancje par sloven e todesc. Aes 11.45, si fasarà la cerimonie civîl in Place Libertât, cui intervents des autoritâts e lis premiazions des scuelis pal concors “Emozions furlanis in viaç pal teritori“, promovût dal Ufici scolastic regjonâl dal F-VJ e de ARLeF, e cu la proiezion dai videos “Lamps di Friûl”, realizâts dai fruts dai centris estîfs dal Comun di Udin.
Il dut al sarà acompagnât di moments une vore significatîfs e emozionants, tant che la esecuzion dal Imni uficiâl dal Friûl, di bande de Arte Voce Ensemble, direzude di Franca Drioli, e la leture de bole imperiâl di bande dal grup storic di Glemone.
Consulte i materiâi
| Ogjet | Cjale |
| Il program complet de Fieste de Patrie dal Friûl 2021 |
|
