fbpx

“Emozions furlanis in viaç pal teritori”

Proclamâts i vincidôrs de edizion X

Domenie ai 12 di Setembar dal 2021, inte suaze de Fieste de Patrie dal Friûl, a son stâts proclamâts i vincidôrs de edizion X dal concors pes scuelis “Emozions furlanis in viaç pal teritori”, pandût dal Ufici Scolastic Regjonâl, in colaborazion cun ARLeF. Il concors al vûl valorizâ e promovi il patrimoni storic, artistic, culturâl e naturâl dal Friûl.

Par ogni vincidôr, la ARLeF e à metût in premi un bon di €250 par comprâ materiâl didatic e tecnologjic.

VINCIDÔRS

Prin premi Sezion Infanzie
Scuele di Lignan
Motivazion: Un biel progjet didatic multidissiplinâr che, midiant dal personaç vuide di Mariutine, al stimole il plurilinguisim dai fruts. La lenghe furlane e je doprade in maniere origjinâl par presentâ concets gnûfs e par insiorâ l’aprendiment des ativitâts di ogni dì.

Prin premi Sezion Primariis
Scuele “Cristoforo Colombo” di Pantianins
Motivazion: Cun chest progjet, i fruts a àn inventade une storie che e tocje temis sociâi impuartants, tant che la amicizie, la diversitât, il bulisim e il rispiet, no dome par chei altris, ma ancje viers la nature e il mont. A àn dimostrât sensibilitât e atenzion pe sostignibilitât e pe tutele dal nestri teritori.

Prin premi Sezion Secondariis di prin grât
Rêt di scuelis “Collinrete”
Motivazion: Un progjet che al met adun lis tantis ativitâts di dutis lis scuelis de rêt. Al è un grant lavôr di colaborazion, che al stice ducj i arlêfs a condividi lis informazions des diviersis comunitâts e lis lôr passions e curiositâts midiant di storiis, zûcs, articui, poesiis… il dut doprant la lenghe furlane!

Stant che tancj lavôrs a jerin une vore meritevui, la jurie e à decidût di segnalâ ancje chestis scuelis pal lôr impegn:

Pe sezion Infanzie, la scuele de infanzie “Maria Forte” di Avile di Buie.
Pe sezion Primariis, la scuele primarie “Collegio della Provvidenza” di Udin.
Pe sezion Secondariis di prin grât, la scuele “Jacopo Pirona” di Paulêt e la scuele “Pellegrino da San Daniele” di San Denêl.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304