E sarà une prime in assolût chê in program joibe ai 24 di Lui, aes 19, insuazade inte inmagante glesie di S. Francesc, a Cividât, cuant che “Elsinore” al debutarà par Mittelfest 2025.
Il spetacul, firmât di Paolo Antonio Simioni e produsût dal Centro Teatro dei Navigli in colaborazion cu la ARLeF e Mittelfest 2025, al puartarà al public dal festival une esperience teatrâl buine di passâ i confins linguistics.
La colaborazion fra la Agjenzie e il Festival multidissiplinâr si conferme, ancjemò une volte, un pat che al vinç, bon di meti in sene rapresentazions di nivel culturâl une vore alt.
“Elsinore” nol sarà dome un spetacul teatrâl, ma une esperience buine di valorizâ la lenghe furlane intun contest di dialic multiculturâl e multilengâl, propit come che al sucêt ogni dì in Friûl.
Il spetacul al sarà metût in sene in cuatri lenghis – furlan, talian, ongjarês e inglês – ma al rivarà a fevelâ a ducj, in graciis de fuarce espressive dal grup internazionâl EuAct, che al ponte a passâ i ostacui linguistics midiant di une metodiche che si fonde su la azion fisiche e su la autenticitât emotive. Il personaç di Amlothi, interpretât di Paolo Antonio Simioni, al fevelarà par furlan in omaç ae tiere che e darà bon acet al spetacul, invezit chei altris personaçs si alternaran intun multilinguisim che al è spieli dal Friûl.
“Elsinore” – che il so non antîc al à il significât di “cueste dai dius” – nol sarà une rileture dal Amlet shakespearian, ma une riscriture che e sarà inlidrisade intal mît origjinari di Amlothi, contât dal storic danês Saxo Grammaticus.
Simioni al menarà cun se il public intun viaç metafisic e visionari, là che la fantasime dal pari di Amlet (Amlothi) e deventarà la puarte par une altre dimension, dulà che la conte umane e interiôr dai personaçs e cjaparà forme. In cheste pièce il public al cjatarà un Amlet interpretât di une femine, la atore Alessia Pellegrino, une sielte che e mostre la volontât de compagnie di passâ ogni limit di gjenar par tornâ veretât e libertât ai personaçs. Il cast, internazionâl, al contarà invezit su Miklós Béres (Claudi), Szofi Berki (Gjertrût), Fanni Wrochna (Ofelie), Gianmaria Martini (Laert), Piergiorgio Tacchino (Orazi).
🎟️Par informazions sui biliets, cjapâ contat cu la bilietarie di Mittelfest telefonant al numar 0432 734316 o scrivint une email a biglietteriamittelfest@gmail.com
“Elsinore”
Regjie Paolo Antonio Simioni
cun
Alessia Pellegrino Hamlet
Paolo Antonio Simioni Amlothi, il pari
Miklós Béres Claudius
Szofi Berki Gertrude
Fanni Wrochna Ophelia
Gianmaria Martini Laertes
Piergiorgio Tacchino Horatio
Assistente Viola Marietti
Consulents artistics Alessia Pellegrino e Leo Kopacin Gementi
Supervisôr tecnic Gabriele Gerets Albanese
