Tal inovâl dai cent agns de sô nassite, Friuli Doc al celebre Pier Paolo Pasolini cun “Di chesta tiara lontana“: un spetacul che al ricuarde la sô persone e in particolâr i scrits par furlan.
Si trate di une leture seniche cun musiche e dissens dal vîf su la poetiche dal scritôr, regjist e poete, dilunc dai siei agns furlans, che si fasarà joibe ai 8 di Setembar dal 2022, aes 21.00, te cort di Palç Morpurgo a Udin, propit te prime serade di Friuli Doc.
La produzion dal Teatro della Sete, finanziade de ARLeF e promovude pe ocasion in colaborazion cul Comun di Udin, e menarà il public a esplorâ il rapuart di Pasolini cun chê lenghe mari sintude a movisi tal aiar, tra lis viis dal paîs de mari, e che tra lis sôs mans e devente poesie.
Sul palc, lis vôs di Caterina Di Fant e Valentina Rivelli a saran compagnadis de musiche dal vîf ideade pe ocasion di Giorgio Parisi e dai dissens, ancje chei dal vîf, di Serena Giacchetta.
E sarà une serade là che poesiis in marilenghe, prose, letaris e testemoneancis, musiche e imagjins si incrosaran par mostrâ atmosferis e paisaçs “di cheste tiere lontane”, cemût che le clamave il poete. La tiere là che si lassave lâ intant des sôs Istâts di vacance, rivant di zovenut a Cjasarse, cul tren. La tiere che i à dât il bon acet tant che abitant e dilunc de vuere lu à menât a scuvierzi “un paîs pierdût jenfri roiis e vîts”, là che al è lât a stâ, cun pôcs contadins tal dulintor, dant vite al progjet de Academiuta di lenga furlana.
Il spetacul al marche la anime furlane e passionade di Pasolini e temis di fonde de sô esperience leterarie in Friûl. O cognossarìn l’incjant dal zovin poete e la delusion dal autôr inte sô maturitât, ma ancje il Pasolini fradi, fi e artist, compagnant la atenzion dal public di Friuli Doc suntun altri furlan innomenât, dopo de esperience positive dal an passât, cuant che il Teatro della Sete al à savût descrivi cuntun bon trat Carlo Sgorlon.
