Domenie ai 3 di Setembar, a son stâts premiâts i miôr curtmetraçs presentâts al festival “Corto a Muris“, une iniziative che si fâs di agns par promovi la produzion cinematografiche, audiovisive e multimediâl amatoriâl e locâl.
Tra lis oparis presentadis, une in particolâr e à colpît la nestre scuadre di Youtubers dal canâl YoupalTubo. I zovins, di fat, a àn colaborât cun entusiasim ae edizion nr. 14 dal festival.
Cussì, il premi speciâl de ARLeF pe opare cinematografiche amatoriâl in lenghe furlane al è lât a “Valôr di scambi” di David Calligaris.
Cheste la motivazion de jurie: “La zovine protagoniste nus compagnie cun lizerece e fantasie a scuvierzi i siei desideris e lis sôs emozions esprimintsi par furlan. Un voli sul avignî dulà che lis gnovis gjenerazions si rindin protagonistis tal fâ vivi la lenghe e a contribuissin a alimentâ un patrimoni individuâl e coletîf straordenari“.
