Lis iniziativis de ARLeF a Friuli Doc 2023
Lenghe furlane, gjenerazions zovinis, mont dai social. Chest al è il focus dal program de ARLeF– Agjenzie regjonâl pe lenghe furlane par Friuli Doc 2023.
Lis iniziativis proponudis de Agjenzie, che e ponte simpri di plui sul avignî de lenghe furlane cun progjets indreçâts ai fruts e ai zovins, soredut midiant des gnovis tecnologjiis, a son dôs.
Il spazi “Aperitivo Io sono Friuli Venezia Giulia” in Zardin Grant, al darà acet al dopli apontament di domenie ai 10 di Setembar, in graciis de colaborazion salde cun PromoTurismoFVG.
Ancje tal cûr di Udin, in place San Jacum, dulà che al è il marcjât des ecelencis cui prodots gastronomics e artesanâi “Io sono Friuli Venezia Giulia”, al è l’Infopoint PromoTurismoFVG. Achì il public al podarà ricevi a gratis materiâi informatîfs e gadgets in lenghe furlane.
Il prin apontament di domenie al è pes 14.30 cul LABORATORI MAMAN! PAI PLUI PIÇUI (si consee di notâsi scrivint a info@sportelfurlan.eu).
Tal event “Ce snait cun Maman!”, Daria Miani, condutore de innomenade trasmission televisive par furlan pai fruts, e animarà il laboratori ludic didatic pai fruts. La lenghe furlane e sarà protagoniste di un zûc speciâl dedicât al mangjâ e il divertiment al è sigurât. A ducj i partecipants
ur vignarà dât un regâl simpatic.
