Agjenzie Regjonâl pe Lenghe Furlane, Protezion Civîl e Direzion Centrâl Salût de Regjon F-VJ si mobilitin par difondi informazions e racomandazions in lenghe furlane par protezisi dal Coronavirus.
Informazions che a saran une vore utilis par frontâ l’inviâsi de fase 2 de emergjence, cuant che si podaran tornâ a davuelzi lis nestris ativitâts, cence però mai sbassâ la difese su la sigurece.
La prime azion specifiche e je dedicade ae sanificazion des mascarutis protetivis, cu la realizazion par furlan dal videotutorial fat dal Grup Comunâl Volontaris di Protezion Civîl dal Comun di Udin. Il video al spieghe cemût lavâ in maniere corete e sigure – par podê jessi dopradis plui voltis – lis mascarutis di stofe che par tant timp a protezaran la nestre cuotidianitât, pe strade, intes buteghis e sul puest di vore.
Par viodi il video complet sul canâl YouTube de Agjenzie baste clicâ achì.
Cjalaitlu e condividêtlu cu vuestris contats. Passâ fûr la emergjence al è un lavôr di scuadre: se si din dongje, o sin plui fuarts.
