Lunis ai 13 di Setembar dal 2021, il president de ARLeF, Eros Cisilino, e il sindic dal Comun di Tavagnà, Moreno Lirutti, a àn firmât il Protocol di Intese trienâl per tutele de lenghe furlane. L’obietîf al è chel di garantî sedi la presince dal furlan dentri des struturis e dai servizis dal Comun, sedi il rispiet dai dirits linguistics daûr di ce che al è stabilît de Cjarte Europeane des lenghis regjonâls o minoritariis, de Convenzion cuadri su la protezion des minorancis nazionâls, dal articul 6 de Costituzion Taliane, de Leç 482/99 su la tutele des minorancis linguistichis storichis e de Leç Regjonâl 29/2007 su la tutele de lenghe furlane.
«Al è un at che al nas de cussience, simpri plui grande, che dome fasint rêt cui teritoris si puedin meti in vore azions di tutele e di valorizazion dal furlan, che a puedin, tal stes timp, jessi in linie ad implen cu lis esigjencis dai citadins», al à sotlineât il president Cisilino.
In cheste suaze di colaborazion e di division dai rûi, la Agjenzie Regjonâl pe Lenghe Furlane e cjaparà la responsabilitât de consulence linguistiche, dal servizi di traduzion, de consulence tecniche in materie di politiche linguistiche, de validazion e de certificazion in cont des azions di promozion dal ûs de lenghe furlane e de condivision sui siei canâi di
comunicazion. De sô bande, invezit, il Comun di Tavagnà al coinvolzarà i siei uficis tal coordenament des ativitâts previodudis pe atuazion dal Protocol e al metarà a disposizion lis sôs risorsis economichis pe realizazion di materiâi e des azions previodudis, promovintlis sui siei canâi di comunicazion.
«Cun di plui» al à marcât il prin citadin, «di là di tignî in considerazion la disponibilitât dal personâl za preparât in maniere adeguade, al è intai nestris intindiments favorî la ativazion di percors di formazion linguistiche pai dipendents che ancjemò no àn une preparazion juste in lenghe furlane».
