fbpx

A Aquilee al vierç il Sportel Regjonâl pe Lenghe Furlane

Al è stât screât a Aquilee il Sportel Regjonâl pe Lenghe Furlane – Basse Furlane, cu la presince dal sindic de antighe citât romane, Emanuele Zorino, la assessore regjonâl Barbara Zill e il president de ARLeF – Agjenzie Regjonâl pe Lenghe Furlane, Eros Cisilino.

Vierzi il Sportel Regjonâl pe Lenghe Furlane – Basse Furlane a Aquilee al rapresente une grande oportunitât pal teritori. Cheste iniziative e contribuìs a dâ ancjemò plui valôr aes nestris lidrîs culturâls e a infuartî il rûl de citât di Aquilee te promozion de ereditât e des tradizions che a travanin di secui la zone de Basse. Aquilee vie pe storie e je stade un grant centri culturâl e vuê no podevin no tignî cont dal fatôr linguistic impuartant che lu à caraterizât e che al va indenant a jessi un element di distinzion de identitât de nestre comunitât.

Cheste scree e à un significât pardabon particolâr stant che e invie une colaborazion sinergjiche tra la Agjenzie, midiant dal so Sportel, il Comun di Aquilee e lis realtâts presintis sul teritori, tant che la Fondazion Aquilee. Cheste citât e rapresente in maniere simboliche la scune de identitât furlane e duncje ancje di chê linguistiche, viodût che za Sant Jaroni nus à lassât scrit che Fortunazian, vescul di Aquilee te metât dal 300, al comentave il Vanzeli in lenghe locâl par favorî la comprension di bande dal popul.

La ativitât di chest Sportel e cjaparà dentri dute la aree de Basse, là che la identitât e la lenghe a son une vore vivarosis.

I Sportei logâts sul teritori furlan, daûr di ce che al sclarìs in maniere complete ancje il Plan gjenerâl di politiche linguistiche pe Lenghe Furlane 2021-2025, a son un pont di riferiment pai ents locâi par garantî ai citadins l’esercizi plen dai dirits linguistics.

I servizis furnîts dai Sportei – finanziâts de Regjon Friûl-VJ, e peâts ai fonts de leç 482/1999 de Presidence dal Consei dai Ministris, e afidâts ae ARLeF tant che organisim competent ae lôr gjestion – a tocjin in particolâr la consulence linguistiche e la traduzion scrite dal talian al furlan; la consulence su la toponomastiche e la segnaletiche stradâl, e sul teme de planificazion linguistiche; il supuart intal davuelzi lis ativitâts di promozion sul teritori; la assistence inte informazion e intal orientament al public.

Il Sportel Regjonâl pe Lenghe Furlane – Basse Furlane al sarà viert al public:
il lunis des 9.00 aes 13.00 e des 13.30 aes 17.30;
martars e vinars des 9.00 aes 13.00,
e al rispuindarà al numar 0431 916919 o ae direzion e-mail basse@sportelfurlan.eu.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304