a Cividât la prime instalazion de opare artistiche, propit te zornade dai 3 di Avrîl, pe Fieste de Patrie dal Friûl
E à non “Une Acuile in Comun” la gnove iniziative promovude de Regjon Autonome Friûl-Vignesie Julie e de ARLeF cul obietîf di valorizâ e promovi la identitât furlane.
Un progjet che in maniere simboliche al scomence cui 3 di Avrîl, date di nassite dal Stât patriarcjâl di Aquilee. La prime cerimonie di scree de opare si fâs a Cividât, la Forum Iulii che e à dât il non ae nestre regjon. La prime “Acuile in Comun” e je instalade sot det loze dal municipi di Cividât.
A àn aderît in maniere calorose adiriture 130 comuns dal Friûl. A ognidun di lôr ur vignarà donade une opare artistiche che, instalade fûr di un edifici rapresentatîf o intun altri lûc di interès storic culturâl, e rapresentarà in mût concret il leam dal popul furlan cu lis sôs lidrîs e cu la sô storie.
L’autôr de opare al è il designer Stefano Borella che si è ispirât ae acuile de bandiere dal Friûl, il simbul che plui di ducj al ten adun i furlans.
La opare e je sacomade suntune lastre di açâl corten. No je une sielte casuâl, parcè che il corten al è un materiâl cognossût pal so aspiet cjalt e materic; e pe sô resistence intal timp, cence pierdi carateristichis struturâls. Chest al devente un simbul, duncje, de resistence e de continuitât de culture furlane. A chest si zonte la sielte de acuile, ancje cheste plene di significât: un dai simbui plui antîcs dal Friûl, presint sul standart medievâl antîc doprât dal patriarcje Beltram intal 1350, vuê in mostre intal Museu dal Domo di Udin. Un vessil ricognossût in maniere uficiâl inte sô version moderne de L.R. 27/2001, che intai secui al è restât un simbul di autonomie e di inlidrisament culturâl.
Dopo di Cividât, “Une Acuile in Comun” e vignarà instalade in chei altris 129 comuns dal Friûl che a àn aderît ae iniziative. Graciis a un codiç QR metût sot de opare, citadins e turiscj a podaran acedi a une pagjine web siore di aprofondiments su la storie milenarie dal Friûl, su la sô bandiere e su chê acuile che e rapresente la identitât dai furlans, tignintju adun.
La organizazion e la promozion de iniziative a son puartadis indenant cu la colaborazion di City ADV e di Elena Iuri che e coordene la realizazion dal progjet.
Consulte i materiâi
| Ogjet | Cjale |
| Cjale il video di YoupalTubo par cognossi miôr la storie de acuile furlane |
|
