UNE ACUILE IN COMUN

Dai 3 di Avrîl dal 2025 indenant, cun scree a Cividât – la antighe FORUM IULII che e à dât il non al Friûl – al tacarà il progjet “Une Acuile in Comun”, che tai prossims mês al previôt la esposizion simboliche di une opare artistiche tal centri storic di 130 comuns dal teritori di lenghe furlane. La opare, creade dal designer Stefano Borella, e sarà instalade in edificis rapresentatîfs o in lûcs di interès storic culturâl. Ispirade ae acuile de bandiere dal Friûl, il simbul che plui di ducj al ten dongje i furlans, e rapresente ancje l’embleme di tantis istituzions publichis e privadis furlanis.

La iniziative e je promovude de Regjon Autonome Friûl-Vignesie Julie e de ARLeF par valorizâ e promovi la identitât furlane. “Une Acuile in Comun” e vûl ricuardâ a ducj i citadins e ai tancj turiscj che ogni dì a vivin la bielece dai centris storics dal Friûl, la storie milenarie e uniche di un teritori tal cûr de Europe e di un popul che al vîf il sens profont de sô identitât, tignint di cont cun braùre la sô lenghe, culture e lis sôs tradizions.

La bandiere dal Friûl di vuê e cjape ispirazion dal standart antîc e e je ricognossude in maniere uficiâl de Regjon Autonome Friûl-Vignesie Julie. E je formade di un drap retangolâr cun tal mieç une acuile di aur in cjamp celest e e ven esponude tai lûcs publics dai comuns cjapâts dentri tal teritori di tutele de minorance linguistiche furlane. La ricorence dai 3 di Avrîl, aniversari de nassite dal Stât patriarcjâl di Aquilee, e segne la ocasion principâl pe sô esposizion uficiâl.

Il Friûl: une regjon tal cûr de Europe

Il Friûl al è une regjon logade te estremitât nordorientâl de Republiche taliane, sul confin cu la Austrie e la Slovenie. Al à une superficie di sù par jù 8000 km² e al è delimitât a Ovest dal flum Livence e a Est dal Timau. In dì di vuê il Friûl si cjate inte regjon aministrative dal Friûl-Vignesie Julie (intes ex provinciis di Gurize, Pordenon e Udin), fûr che pal mandament di Puart, che al è inte regjon dal Venit, in provincie di Vignesie. Il Friûl al è componût di une grande plane e di une cengle di monts dulintor, fate des Alps Cjargnelis e di un toc curt des Alps Juliis.

• Discuvierç di plui

  Abitât in antîc di popolazions preceltichis e celtichis, al ven plui tart concuistât dai Romans, che tacant di Aquilee, lu fasin deventâ un lûc fondamentâl par mantignî e disvilupâ il lôr domini sul continent european. Dopo colât l’Imperi roman, il Friûl al è teatri di invasions e di scorsadis, par po deventâ la sede dal prin Ducât langobart.
  Cu la rivade dal Sacri Roman Imperi, la regjon e torne a vê un rûl strategjic, che al tocje il so massim cu la creazion dal Stât patriarcjâl di Aquilee tal 1077. Chest Stât eclesiastic al guviernarà il Friûl fin al 1420, cuant che la Republiche di Vignesie lu concuiste. Tal 1516, cul Tratât di Noyon, la Serenissime e ricognòs il domini dai Asburcs sul Friûl orientâl.
  Colade Vignesie tal 1797, ancje il rest dal Friûl al devente part dal Imperi austriac, par po jessi anetût al Ream di Italie tal 1866 (fûr che il Friûl orientâl, anetût dome tal 1919).
  Vie pal secul XX, il Friûl al è stât colpît di events dramatics, come i doi conflits mondiâi e il tragjic taramot dal 1976. Vuê, il Friûl al è caraterizât di un nivel di disvilup economic alt, cun setôrs clâf tant che la industrie, il cumierç, la agriculture e il turisim. Pe sô storie siore, lis sôs cuatri lenghis uficiâls (furlan, sloven, todesc e talian), i paisaçs unics e la sô tradizion enogastronomiche al è une des regjons plui particolârs de Italie.

AL PROGJET “UNE ACUILE IN COMUN” A ÀN ADERÎT CHESCJ COMUNS:

---