Maman!

La prime trasmission televisive par fruts fûr par fûr par furlan

Maman! e je la prime trasmission televisive par fruts in lenghe furlane. In onde dai 23 di Dicembar dal 2016, in graciis dal grant sucès di public, e je rivade ae sô cuarte stagjon. Il program al è il risultât di une coproduzion de ARLeF – Agjenzie Regjonâl pe Lenghe Furlane e di Telefriuli, nassût cul intindiment di jemplâ la assence di programs par furlan dedicâts ai fruts e ufrî, intal stes timp, un formât bon di meti in contat i frutins e lis fameis cul plurilinguisim di cheste regjon. Il program al ufrìs ai telespetatôrs esperiencis ludichis e educativis justis pai fruts de scuele materne e primarie e, propit par chest, Maman! al è un program di condividi cui amîs, cui gjenitôrs, cui nonos, ma ancje cu lis mestris e cui compagns di scuele.

Maman! al ufrìs ai piçui telespetatôrs la oportunitât di imparâ la lenghe furlane cun spontaneitât, midiant di cjants, bai, leturis animadis, cartons animâts, zûcs, rubrichis specifichis e lavoruts sempliçs, ancje par mieç de ativitât ludiche. La sigle origjinâl che e vierç ogni pontade fin de prime stagjon (peraulis di Daria Miani e musiche di Flaviano Miani), cussì come dutis lis cjançons cjantadis di Daria Miani, a rapresentin un supuart indispensabil pal aprendiment de lenghe, in gracie ancje dai tescj in soreimpression che a judin la partecipazion ative dai piçui spetatôrs.

Ancje i cartons animâts a insiorin la trasmission e a judin a sostignî la esperience linguistiche dai fruts; di fat, des imagjins in moviment si puedin intuî i significâts des peraulis e des azions, rivant in maniere divertente a un aprendiment linguistic eficaç, in graciis de esposizion ae comunicazion verbâl e no verbâl. Inte prime stagjon di Maman! a son stadis inseridis lis pontadis di “Omenuts“, il carton animât famôs che al è cognossût in dut il mont cul titul “Little People” (Mattel_Fisher Price), tradot in lenghe furlane (SFF e Raja Films). Protagoniscj a son Lole, Miute, Pieri, Bete e Tonin, i cinc fruts che, cu la lôr abilitât e la voie di aventure, a frontin ogni dì une storie gnove, intun mont fat a misure di frut. Pe seconde, tierce e cuarte edizion di Maman! al è rivât il carton animât “Tui e Tuie“, une produzion russe di grant sucès lade in onde in Australie e Gnove Zelande su Disney Channel, che ARLeF e à dopleât par furlan in graciis di Belka Media e Raja Films. I protagoniscj a son doi gjatuts che a vivin aventuris di ogni gjenar e, a ogni pontade, a imparin dai lôr compagns di viaç gnovis regulis dal vivi sociâl. La cuinte stagjon e propon il gnûf carton animât “Rite e Cjossul“, o ben l’adatament dai libris ilustrâts “Rita et Machin” di Jean-Philippe Arrou-Vignod e Oliver Tallec, publicâts in France, che a contin des aventuris di une frute e dal so cjanut tant ninin.

La seste stagjon e propon dôs grandis novitâts: il carton animât “Horaci l’Inuit“, une serie catalane voltade par furlan in graciis de ARLeF, e la rubriche La cusine Bete, cusine strambe di Daria, che e torne ancje tes stagjons dopo. I protagoniscj dal gnûf carton animât a son Horaci e Sedna, doi eschimesuts che a fevelin par furlan e che a vivin aventuris di ogni sorte ator pal Artic. La setime stagjon e propon une gnove rubriche indulà che inglês e furlan si incuintrin: Zuìn cu lis lenghis, cu la gnove amie di Daria Julia Renalds e i siei fîs Max e Leo. Cun di plui, si zonte une altre rubriche dute animade: i videofumets di “Ghiti“, aventuris curtis in compagnie di Stele, Ors, Cocâl, Ghiti e altris amîs. La otave stagjon e propon lis aromai consolidadis rubrichis Zuìn cu lis lenghis e La cusine Bete, simpri in compagnie di Max e Leo e di Daria che si travestìs di Bete, adun cun tancj gnûfs temis frontâts te rubriche La pueste di Maman!.

La novesime stagjon e introdûs un gnûf personaç, dongje di Daria: e je Desiree, la sô vicine di cjase, interpretade di Desiree Chiappo Debegnach. Tra zûcs, aventuris e lis pontadis dai Numaruts, i fruts a cjataran ancje la gnove rubriche di videos musicâi Il ream dai fruts e i amîs di simpri di Daria: Max e Leo, Vigji e la cusine Bete.

Maman! al furnìs tancj stimui ai fruts e aes fameis, declinabii ancje intun strument didatic otim, util aes insegnantis de scuele de infanzie e de scuele primarie pal insegnament de lenghe furlane. La conduzion di Maman! e je curade di Daria Miani. Maman! al va in onde su Telefriuli (canâl 11) ogni vinars aes 18:30 e in repliche la domenie aes 7:00 di buinore e aes 13:00. Di Zenâr dal 2023, lis pontadis a son disponibilis on demand su Telefriuli (si pues acedi di cualsisedi smart Tv cuntune conession a internet).

• PRIME STAGJON

  Inte cjasute dai tancj colôrs là che a vivin Daria e il so gjatut dolç Vigji, a tuchin ae puarte ospits simpatics: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A insiorâ ogni pontade a son tantis rubrichis tant che “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, la riviste par fruts di “La Vite Catoliche”; “Master Cogo Furlan”, cu la preparazion di plats golôs facii; il spazi dedicât ai videos inviâts di cjase dai stes telespetatôrs; “99 Peraulis”, lis cjartis ilustradis che cun chês i fruts a puedin imparâ peraulis in plui lenghis. In sierade di trasmission, une rubriche dedicade ai adults: une video interviste curte dal progjet “Cressi cun plui lenghis”, par informâ e sensibilizâ i gjenitôrs, i nonos e i educadôrs sui vantaçs de sielte dal plurilinguisim fin di picinins.
  

  Prime stagjon: 23.12.2016 – 09.06.2017
  Condutore e autore: Daria Miani
  Regjie: Luca Fornasiero
  Redazion e consulence linguistiche ARLeF: Priscilla De Agostini, Linda Picco, Miriam Pupini
  Responsabil dal progjet pe ARLeF: William Cisilino
  Coordenament pe ARLeF: Priscilla De Agostini
  Sigle: vôs e peraulis di Daria Miani / Musiche di Flavian Miani / Foto di Silvia Raber / Animazion di Pierangelo Buttazzoni e Davide Nicolicchia
  Numar pontadis: 25
  Durade: 20 minûts cirche
  

• SECONDE STAGJON

  Pe seconde stagjon, a Daria Miani e al so gjatut tenar Vigji si zonte Chiara Donada. I lôr dopomisdîs divertents a ufrissin in maniere simpatiche aprofondiments su argoments di diviers ambits, ma ancje tantis cjançons legris cjantadis insiemi, bielis storiis, zûcs e leturis fantastichis. A ogni pontade al rive in visite “Siôr Timp” (Manuel Buttus), un personaç tant estrôs che al conte alc di gnûf, insegnant ai telespetatôrs robis utilis e divertentis.
  
  Seconde stagjon: 12.01.2018 – 15.06.2018
  Condutoris e autoris: Daria Miani e Chiara Donada
  Cu la partecipazion di: Manuel Buttus
  Responsabil di produzion ARLeF: William Cisilino
  Coordenament gjenerâl: Vittorio Vella (Deltastudios)
  Regjie: Luca Fornasiero
  Musichis origjinâls: Flaviano Miani (musiche) e Daria Miani (tescj)
  Consulence linguistiche e otimizazion: Linda Picco e Elena Zanussi (Calt sas)
  Animazion e sigle: Pierangelo Buttazzoni e Davide Nicolicchia
  Numar pontadis: 23
  Durade: 20 minûts cirche

• TIERCE STAGJON

  La tierce stagjon e manten in sostance il formât dal an di prime cu la conduzion di Daria Miani e Chiara Donada che a vivin ogni pontade, adun cul gjat Vigji, aventuris di ogni gjenar, insioradis di tantis cjançons, filastrocjis, contis, zûcs e barzaletis. Ma a inricjî la gnove serie a jentrin in sene doi personaçs gnûfs tant simpatics: “Ulli”, la moscje furlane scherçose e matarane e “Free”, il crot inglês cul cjâf simpri fra i nûi.

  .  

  Tierce stagjon: 12.10.2018 – 14.06.2019;
  Condutoris e autoris: Daria Miani e Chiara Donada
  Responsabil di produzion ARLeF: William Cisilino
  Coordenament gjenerâl: Vittorio Vella (Deltastudios)
  Regjie: Tommaso Ravo
  Musichis origjinâls: Flaviano Miani (musiche) e Daria Miani (tescj)
  Consulence linguistiche e otimizazion: Michele Calligaris e Linda Picco (Calt sas)
  Animazion e sigle: Pierangelo Buttazzoni e Davide Nicolicchia
  Numar pontadis: 34
  Durade: 20 minûts cirche

• CUARTE STAGJON

  Lis protagonistis e condutoris de cuarte stagjon a son di gnûf Daria Miani e Chiara Donada, che aromai a àn strente une amicizie fuarte cun “Free”, il crot inglês cul cjâf simpri fra i nûi, e “Ulli”, la moscje furlane scherçose e matarane. Ducj insiemi, cu la solite compagnie dal gjatut Vigji, a vivin aventuris di ogni gjenar, imparant alc di gnûf in ogni pontade. No mancjin po ancje tantis cjançons, filastrocjis, contis, zûcs e barzaletis che a fasin divertî ducj i fruts.

  Cuarte stagjon: 11.10.2019 – 20.12.2019
  Condutoris e autoris: Daria Miani e Chiara Donada
  Cu la partecipazion di: Silvia Piani e Silvia Gazzetta (Free & Ulli)
  Responsabil di produzion pe ARLeF: William Cisilino
  Coordenament gjenerâl: Vittorio Vella (Deltastudios)
  Regjie e animazion sigle: Tommaso Ravo
  Musichis origjinâls: Flaviano Miani (musiche), Daria Miani (peraulis)
  Consulence linguistiche e otimizazion: Michele Calligaris e Linda Picco – Sportel Regjonâl pe Lenghe Furlane (Calt sas)
  Numar pontadis: 11
  Durade: 20 minûts cirche

• CUINTE STAGJON

  Daria Miani e torne cu la conduzion de cuinte stagjon siore di tantis novitâts. Ogni pontade e tache cu “La Pueste di Maman!”, la gnove rubriche dedicade aes curiositâts e aes domandis che i fruts a mandin ae redazion, che e je ancje un spazi di condivision par cui che al vûl mandâ un dissen o saludâ i amîs in maniere speciâl. E je ancje la gnove serie di cartons animâts par furlan Rite e Cjossul che e conte des zornadis divertentis de piçule Rite e dal so cjanut. Insiemi cul so gjatut Vigji, i amîs di simpri e chei gnûfs, Daria e ten compagnie ogni setemane ai siei piçui telespetatôrs cun tantis aventuris, ma ancje cun cjançons, storiis di lei, zûcs e lavoruts…

  Cuinte stagjon: inizi 09.10.2020 – 11.06.2021
  Condutore: Daria Miani
  Autoris: Daria Miani e Francesca Battistutta
  Responsabil di produzion ARLeF: William Cisilino
  Coordenament gjenerâl: Calt sas
  Regjie: Martina Beraldo, Francesco Snidero
  Musichis origjinâls: Flaviano Miani (musiche), Daria Miani (tescj)
  Consulence linguistiche e otimizazion: Sportel Regjonâl pe Lenghe Furlane (Calt sas)
  Ringraciaments: Federica Del Pino e Marina Valentinis
  Durade: 24 minûts cirche

• SESTE STAGJON

  La seste stagjon e propon une grande novitât: il carton animât “Horaci l’Inuit”, une serie catalane, voltade par furlan in graciis de ARLeF. I protagoniscj dal gnûf carton animât a son Horaci e Sedna, doi eschimesuts che a fevelin par furlan e che a vivin aventuris di ogni sorte ator pal Artic, plen di ors polârs, siamans, igloos e kayaks. Horaci e Sedna, duncje, si zontin a chei altris protagoniscj di Maman!, tant che Daria, il so gjat Vigji e sô cusine Bete, che tes tantis rubrichis dal program a fasaran imparâ, scuvierzi e divertî i plui piçui.

  Seste stagjon: inizi 08.10.2021 – 10.06.2022
  Condutore: Daria Miani
  Autoris: Daria Miani e Francesca Battistutta
  Responsabil di produzion ARLeF: William Cisilino
  Coordenament gjenerâl: Calt sas
  Regjie: Martina Beraldo, Francesco Snidero
  Musichis origjinâls: Flaviano Miani (musiche), Daria Miani (tescj)
  Consulence linguistiche e otimizazion: Sportel Regjonâl pe Lenghe Furlane (Calt sas)
  Durade: 24 minûts cirche

• SETIME STAGJON

  La setime stagjon di Maman! e je lade in onde di vinars ai 7 di Otubar dal 2022 fin a vinars ai 16 di Jugn dal 2023, cun Daria, Vigji il gjat pelandron, Horaci e Sedna, Rite e Cjossul e Tui e Tuie. A son stâts fats tancj biei lavoruts cu la cusine Bete e tantis bielis aventuris ator pal Friûl… e no dome! Cun di plui, si e zontade une gnove rubriche indulà che inglês e furlan si incuintrin: Zuìn cu lis lenghis, cu la gnove amie di Daria Julia Renalds e i siei fîs Max e Leo.

  Setime stagjon: inizi 07.10.2022 – 16.06.2023
  Condutore: Daria Miani
  Autoris: Daria Miani e Francesca Battistutta
  Responsabil di produzion ARLeF: William Cisilino
  Coordenament gjenerâl: Calt sas
  Regjie: Martina Beraldo, Francesco Snidero
  Musichis origjinâls: Flaviano Miani (musiche), Daria Miani (tescj)
  Consulence linguistiche e otimizazion: Sportel Regjonâl pe Lenghe Furlane (Calt sas)
  Durade: 26 minûts cirche

• OTAVE STAGJON

  La otave stagjon di Maman! e je lade in onde su Telefriuli dai 13 di Otubar dal 2023 ai 21 di Jugn dal 2024. E torne Daria cu la cusine Bete e i amîs Max e Leo par imparâ tantis gnovis peraulis par inglês e fâ gnûfs laboratoris creatîfs. Nol mancje Vigji, il gjat che tant i plâs polsâ, e i cartons animâts di Horaci e Sedna, Rite e Cjossul, Tui e Tuie e Ghiti.

  Otave stagjon: inizi 13.10.2023 – 21.06.2024
  Condutore: Daria Miani
  Autoris: Daria Miani, Francesca Battistutta, Sabina Pituello
  Responsabil di produzion ARLeF: William Cisilino
  Coordenament gjenerâl: Calt sas
  Regjie: Martina Beraldo, Francesco Snidero
  Musichis origjinâls: Flaviano Miani (musiche), Daria Miani (tescj)
  Consulence linguistiche e otimizazion: Sportel Regjonâl pe Lenghe Furlane (Calt sas)
  Durade: 26 minûts cirche

• NOVESIME STAGJON

  La novesime stagjon di Maman! e je in onde su Telefriuli dai 11 di Otubar dal 2024, ogni vinars aes 18.30. Al fâs il so debut un gnûf personaç: Desiree, la vicine di cjase di Daria. Insiemi a varan une vore di aventuris e di zûcs. No mancjin i amîs di simpri, Max e Leo e il gjat Vigji; la cusine Bete e proponarà gnûfs lavoruts e fatuts curiôs pai plui piçui. A tornin ancje i protagoniscj dai Numaruts, adun cu la gnove rubriche “Il ream dai fruts”.

  Novesime stagjon: inizi 11.10.2024 – corinte
  Condutore: Daria Miani
  Cu la partecipazion di: Desiree Chiappo Debegnach
  Autoris: Daria Miani, Francesca Battistutta, Sabina Pituello
  Responsabil di produzion ARLeF: William Cisilino
  Coordenament gjenerâl: Calt sas
  Regjie: Martina Beraldo
  Musichis origjinâls: Flaviano Miani (musiche), Daria Miani (tescj)
  Consulence linguistiche e otimizazion: Sportel Regjonâl pe Lenghe Furlane (Calt sas)
  Durade: 26 minûts cirche

• MAMAN! IN CJARTE SU ‘LA VÔS DAI FURLANS’

  Dopo il sucès vût za de prime stagjon televisive di Maman! tra i piçui telespetatôrs, la ARLeF e à inviade ancje la edizion su cjarte, par stimolâ i fruts a lei e a zuiâ in lenghe furlane. Dal mês di Otubar dal 2017 al mês di Novembar dal 2022, la pagjine di Maman! e à vût il so spazi intal setemanâl “Il Friuli”.
  Intal principi e jere curade di Daria Miani cu la consulence linguistiche dal Sportel Regjonâl pe Lenghe Furlane de ARLeF, vuê dute la pagjine e je ideade e coordenade dal Sportel. Dai 25 di Novembar dal 2022, la pagjine di Maman! si è trasferide intal setemanâl “La Vôs dai Furlans”, mantignint la stesse struture.

  La pagjine e regale ai plui piçui tancj moments par divertîsi, ma ancje une vore di stimui par imparâ la lenghe furlane cul zuiâ. In ogni jessude a son rubrichis diferentis, come zûcs divertents e spazis par dissegnâ e piturâ; fats e curiositâts ma ancje conseis di libris di lei o proverbis e storiis pôc cognossudis; no mancjin lis barzaletis e i induvinei che ur fasin fâ une ridade ancje ai plui grancj; lavoruts che a stimolin la manualitât e la creativitât e tantis cjançons e cartons animâts di tornâ a cjalâ insiemi.

Consulte i materiâi

Ogjet	Cjale
Cjale lis pontadis de prime stagjon
Cjale lis pontadis de seconde stagjon
Cjale lis pontadis de tierce stagjon
Cjale lis pontadis de cuarte stagjon
Cjale lis pontadis de cuinte stagjon
Cjale lis pontadis de seste stagjon
Cjale lis pontadis de setime stagjon
Cjale lis pontadis de otave stagjon
Cjale lis pontadis de novesime stagjon
Cjale in linie lis pagjinis di Maman! su Il Friuli
Cjale in linie lis pagjinis di Maman! su La Vôs dai Furlans
Discjame il dissen di colorâ
Discjame il test de sigle e cjante
Scolte la sigle di Maman!
Scolte la cjançon di Mastercogo
Scolte e cjante dutis lis cjançons di Maman!

Imagjins