#Europe #Manifestazions #Plurilinguisim

Zornade Europeane des Lenghis

Unîts inte diversitât nol è dome il sproc de Union europeane, ma ancje la fuarce dal nestri continent.

Si stime che inte Union Europeane si fevelin passe 80 lenghis diferentis; di chestis, lis lenghis uficiâls a son 24 e chês minoritariis passe 60, feveladis di 50 milions di personis che a fasin part di une minorance nazionâl o di une comunitât di lenghe minoritarie. Une diversitât linguistiche e culturâl di prudelâ e valorizâ, tant che element di fonde de societât multietniche contemporanie.

Il Consei de Europe al promôf il pluralisim propit parcè che lu calcole un strument che al jude la comprension interculturâl, e un element clâf dal nestri patrimoni culturâl. Al è juste apont su sô iniziative che ai 26 di Setembar di ogni an si festeze la Zornade Europeane des Lenghis.
La prime Zornade Europeane des Lenghis e je stade organizade insiemi dal Consei de Europe e de Union europeane tal 2001, e e à cjapât dentri milions di personis cun ativitâts par celebrâ la diversitât linguistiche e par promovi l’aprendiment des lenghis. Viodût il sucès vût de iniziative, il Consei al à decidût di celebrâle ogni an

I obietîfs gjenerâi de Zornade a son di informâ il public su la impuartance di imparâ plui lenghis, cul fin di incressi il plurilinguisim e la comprension culturâl; di promovi, tutelâ e favorî la diversitât linguistiche e, par finî, di incoragjâ a imparâ lis lenghis dilunc di dute la vite, a cualsisedi etât e par cualsisedi reson. Imparâ lis lenghis di altris popolazions nus jude a capî miôr la lôr culture e a superâ lis diferencis.

Par vê plui informazions su la Zornade, su dutis lis iniziativis organizadis in Europe e par discjamâ materiâi didatics e informatîfs, si pues lâ su la pagjine dedicade ae manifestazion sul sît dal Consei de Europe.

Lis competencis linguistichis no son dome une necessitât comune, intun mont globalizât e intune economie cussì in moviment, ma ancje un dirit di ducj. Chest al è un dai messaçs principâi de Zornade Europeane des Lenghis.

In ocasion di cheste impuartante manifestazion, la Agjenzie Regjonâl pe Lenghe Furlane e organize in centri a Udin un spazi informatîf e promozionâl cu la distribuzion a ducj i citadins di materiâi e di gadgets sul significât de Zornade e su la sô impuartance, su la lenghe furlane e su lis ativitâts de ARLeF.

Consulte i materiâi

Ogjet Cjale
Flyer Zornade Europeane des Lenghis
Logo Zornade Europeane des Lenghis
Zornade Europeane des Lenghis 2017 - Program ARLeF

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304