#Europe #Identitât

Furlan Lenghe de Europe

“Furlan, Lenghe de Europe” e je une mostre itinerante promovude de ARLeF- Agjenzie Regjonâl pe Lenghe Furlane, cu la poie de Regjon Friûl – Vignesie Julie e curade di William Cisilino.

E je une esposizion che e ilustre la identitât, il contest storic e socioculturâl de lenghe furlane e la politiche linguistiche metude in vore sul teritori furlanofon. E propon al visitadôr informazions claris e puntuâls, doprant un lengaç imediât, supuartât di un aparât iconografic une vore siôr.

E je struturade in 14 roll up che a stan in pîts di bessôi e che a puedin jessi doprâts e sistemâts cun facilitât: in plui, a son disponibii tes versions furlan/inglês o furlan/talian.

Chescj i temis tratâts:

  • Incuadrament gjeografic
  • Incuadrament storic
  • Svilup economic de aree
  • Multilinguisim
  • Lenghe furlane
  • Incuadrament sociolinguistic
  • Politichis di tutele de lenghe furlane
  • Leterature, musiche, teatri, cine
  • Media in lenghe furlane

A supuart de Mostre e ven ufierte ancje une brochure esplicative disponibile te version furlan/inglês.

La mostre e à fat za diviersis tapis: dopo jessi stade screade a Bruxelles, li dal Ufici di colegament de Regjon F-VJ, dulà che e je restade esponude dai 27 di Otubar ai 18 di Novembar dal 2016, e je stade puartade a Teramo, dai 7 ai 16 di Dicembar dal 2016, in ocasion de cunvigne internazionâl “Valutare le politiche linguistiche. Quali obiettivi, criteri, indicatori”. Chês altris sedis espositivis a son stadis chês di Sapade, dai 26 di Març ai 9 di Avrîl dal 2017, pe Fieste de Patrie dal Friûl dal 2017; Merêt di Tombe, dai 10 ai 20 di Mai dal 2017, pe Setemane de culture furlane; Cormons, dai 20 di Mai ai 2 di Jugn dal 2017, in ocasion de Fieste da Viarte e cumò e sarà a Udin, dai 7 ai 10 di Setembar dal 2017 par Friuli Doc.

La mostre e je a disposizion di Ents e Associazions par esposizions temporaniis. Par informazions contatâ:
ARLeF – Agjenzie Regjonâl pe Lenghe Furlane
vie de Prefettura, 13 – 33100 Udin
Tel. +39 0432 555812
e-mail: arlef@regione.fvg.it

Credits
E à coordenât il progjet Adriana Cruciatti – CALT, la grafiche e je par cure di Giulietta Aita – CALT, lis traduzions in lenghe furlane di Elena Zanussi – CALT e chês par inglês di Tonino Solinas – Exist di Francesca Piazzi.

Consulte i materiâi

Ogjet Cjale
Schede tecniche de mostre

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304