
Anìn!
Manuâl pal insegnament
de lenghe furlane te scuele primarie
Anìn!
al è il prin manuâl pensât par compagnâ i arlêfs de scuele primarie a scuvierzi la lenghe furlane, lis particolaritâts dal teritori dal Friûl, de sô storie e de sô culture.
Al è un progjet promovût de ARLeF in atuazion dal Plan gjenerâl di politiche linguistiche pe lenghe furlane 2021-2025 de Regjon Autonome Friûl-Vignesie Julie.
Al ven donât a ducj i arlêfs des scuelis primariis che i lôr gjenitôrs a àn aderît al insegnament de lenghe furlane tant che previodût de leç 482/99 e de leç regjonâl 29/2007.
Anìn! 1
Impare e zuie cun Ane la Agane e Sandri il Sbilf

Manuâl pes classis 1e e 2e
Compagnâts di doi personaçs fantastics, Ane la Agane e Sandri il Sbilf, i fruts a cjapin sù in maniere graduâl la competence comunicative orâl, une prime
capacitât di leture e i prins elements di gramatiche, ortografie e ûs de lenghe.
Anìn! 2
In viaç ator pal Friûl

Manuâl pes classis 3e, 4e e 5e
Compagnâts di Anute e Alex, vuidis curiosis e plenis di snait, i arlêfs a aprofondissin in maniere graduâl lis particolaritâts storichis e gjeografichis dal Friûl, e a cjapin sù competencis linguistichis comunicativis de lenghe furlane. Il volum al è insiorât di box specifics di educazion civiche e il test si pues doprâ tal orari curicolâr ordenari di storie e gjeografie, daûr dal program CLIL..
Anìn 1 e Anìn 2 si caraterizin par
- percors cun tabelis figuradis, liniis dal timp, mapis des cognossincis;
- grafiche e strategjiis par facilitâ la comprension dal test;
- esercizis graduâi, box cun glossaris e peraulis clâf;
- sielte antologjiche curade par stiçâ il plasê de leture;
- dimension plurilengâl, cun inseriment di parts tematichis par inglês e altris lenghis feveladis in regjon.
Liniis Vuide pai docents

Ai dirigjents scolastics, ai referents pal insegnament de lenghe furlane e a ducj i docents impegnâts tal insegnament dal furlan, Anin! 1 e 2 a son consegnâts compagnâts des Liniis Vuide pai docents, par orientâ la azion di progjetazion dai curicui in e di lenghe furlane e par favorî il lôr ûs coret.
Lis soluzions dai esercizis dai doi volums si puedin discjamâ chi sot.
I posters educatîfs
di doprâ in classe
Un par ogni cicli scolastic: un supuart util par insegnâ la lenghe furlane in maniere simpri plui vivarose, stiçant la curiositât e la partecipazion dai fruts.
I posters a son dâts fûr a dutis lis classis de Scuele de Infanzie e de Scuele Primarie li che si insegne la lenghe furlane.
Chi sot si puedin discjamâ i pdf in A3.

Poster
La mê zornade
Scuele de Infanzie
I dissens, metûts in ordin temporâl, a judin il frut a tignî a ments lis ativitâts di ogni dì e i moments impuartants de zornade, tant che fâ di gulizion, gustâ, lavâsi i dincj e vie indevant…

Poster
Alfabet de lenghe furlane
Scuele Primarie
classis 1e e 2e
Par imparâ a lei e a scrivi l’alfabet e i digrams. Chi sot si pues scoltâ la pronunzie di ogni letare e des peraulis che a tachin cun chel sun. Si pues ancje discjamâ il pdf cu lis singulis letaris. Il frut al podarà taiâlis fûr, metilis dongje e creâ gnovis peraulis, sot de vuide dal insegnant.

Poster
Friûl
Scuele Primarie
classis 3e, 4e e 5e
Par imparâ i confins dal Friûl, trop che al è grant, lis citâts plui impuartantis e i cinc sîts dal Patrimoni mondiâl Unesco. Chi sot si pues discjamâ il pdf par savê di plui su chest ultin argoment.
INFORMAZIONS
Par cualsisei informazion, i docents a puedin contatâ il Sportel Regjonâl pe Lenghe Furlane a chescj riferiments: tel. 0432 1743400, e-mail scuele@sportelfurlan.eu