fbpx
#Didatiche #Editorie #Fruts #Plurilinguisim #Scuele

99DOMANDE. Diversità Linguistica & Diritti Linguistici

Domandis e rispuestis su la diversitât linguistiche e sui dirits linguistics intun libri zûc in scjate

99 Domandis – Diversitât linguistiche & dirits linguistics al è un strument bilengâl furlan-talian, divulgatîf e didatic che al conte ce che e je la diversitât linguistiche e parcè che al è impuartant difindile.
La publicazion, realizade in colaborazion cu la Associazion LEM-Italia, e je curade di Giovanni Agresti, ricercjadôr de Universitât di Teramo, cu la colaborazion di 10 studiôs di nivel internazionâl: Henri Giordan (France), Gabriele Iannàccaro (Italie), Jean Léo Lèonard (France), Ksenija Djordjevic Léonard (Serbie), Pierfranco Bruni (Italie), Maria Catricalà (Italie), Fernand de Varennes (Canadà), Paola Desideri (Italie), Ahmed Boukous (Maroc) e Michele Gazzola (Italie).
Publicade di Futura Edizioni di San Vît dal Tiliment (PN) inte edizion bilengâl talian-francês e dopo inte version furlan-talian, in graciis de poie dal Consei regjonâl dal F-VJ e de ARLeF – Agjenzie Regjonâl pe lenghe furlane, cheste scjatule zûc di 99 cjartis/domandis, e ancjetantis rispuestis, dividude in 10 sezions tematichis, e rapresente un strument impuartant di informazion e di cognossince che e dopre il plasê ludic par stimolâ la capacitât di imparâ e di cjapâ sù gnûfs concets.
Il teme al è tant atuâl e articolât, e i dîs studiôs a individuin une buine part des informazions che si scuegnin cognossi in assolût par contribuî a preparâ un mont miôr e une vere societât de cognossince.

I dirits linguistics a son ancje e soredut dirits umans: dirit a doprâ la proprie marilenghe par podê stâ al mont a pâr di chei altris, ma ancje dirit a alternativis culturâls, ideologjichis e fintremai economichis. La lenghe e je une carateristiche fondamentâl de specie umane, cheste e determine la modalitât e la cualitât des relazions, lis leturis e lis interpretazions dal reâl e dal imagjinari: e da nons aes robis, e identifiche e e da identitât. Ogni lenghe e riflet la varietât straordenarie, intal timp e intal spazi, dai mûts di vite e di pinsîr de umanitât. Cun dut chest la nature de lenghe no ven insegnade (Giovanni Agresti)”.

Il progjet de Golaine “99domande” al à ancje un significât sociâl, che lu rint ancjemò plui preziôs. Di fat, al nas de idee che, in graciis de culture, si pues ufrî lavôr e integrazion sociâl a personis in situazion di disavantaç o cun disabilitâts fisichis/psichichis che sedi no a saressin esclududis dal mont dal lavôr. Il progjet, di fat, al è realizât dut dentri dai laboratoris sociâi de cooperative e lis ilustrazions a son fatis dal centri socioeducatîf Punto Zero. Cuistant i libris di Futura Edizioni si contribuìs duncje a sostignî e a alimentâ un progjet sociâl che al cumbine culture, marcjât e solidarietât.

Par informazions: www.futuracoopsociale.it


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304