Pe Setemane de Culture Furlane 2024, inmaneade de Societât Filologjiche Furlane, la ARLeF e propon doi apontaments pai plui piçui.
Sabide ai 11 di Mai a son in program zûcs e laboratoris cu la lenghe furlane, in doi Comuns.
“Libris, figots e ridadis” al è il prin apontament de zornade. Si fasarà li de Biblioteche civiche “Elsa Buiese” di Martignà (vie Delser 33), aes 10. Un event realizât cu la colaborazion dal Comun e la poie inte organizazion de associazion “Chei di Martignà”.
Tal program de buinore e je la leture animade de “Il libri gjat” e daûr un laboratori creatîf. I fruts dai 3 ai 7 agns a varan la pussibilitât di imparâ la lenghe zuiant, ma ancje di “figotâ” il protagonist dal libri (publicât par talian di Minibombo e inte version par furlan de ARLeF), che al vignarà dât fûr ai fruts tant che regâl. Dopo dal laboratori, e sarà une buine mirinde par ducj!
Par partecipâ si à di notâsi dentri di miercus ai 8 di Mai, contatant il Sportel regjonâl pe lenghe furlane: 04321743400 o info@sportelfurlan.eu.
Viôt cuâl che al è il secont apontament de ARLeF pe Setemane de Culture Furlane
