Il docufilm “Marcho. L’ultima bandiera” al va indenant cui sucès a nivel internazionâl. Dopo de prime assolude su Rai Storia, il dopli ricognossiment intai USA (il “Best Historical Film” e l’“Award of Excellence Special Mention”), e dopo jessi deventât ancje un satûl in version DVD, Blu Ray e Ultra HD Blu Ray, cumò al rive ancje su Prime Video: la plateforme streaming video on demand di proprietât Amazon e je la plui doprade in Italie, cui siei passe 11 milions di iscrits e il 26% di cuotis. Cun di plui, in curt al sarà a disposizion su Apple tv e su Google Play (inte sezion Film midiant de plateforme YouTube).
La nestre identitât e la nestre lenghe a rivin di fat suntune plateforme doprade a nivel globâl, e duncje ancje dai furlans tal forest, di là che dai furlans di chenti. Ducj a podaran gjoldi di un prodot cinematografic e documentaristic ecezionâl, dentri di un imprest che al è une suaze internazionâl e che pe prime volte al da acet a une produzion in lenghe furlane.
“Marcho. L’ultima bandiera” al è disponibil in streaming in Italie e intai paîs di lenghe inglese. Cui che al à za un abonament al podarà viodi il film daurman. Cui che invezit nol à nissun abonament, nol è escludût: il film si lu pues cjoli a nauli o comprâlu. In cheste maniere, ducj a puedin cjalâlu sielzint la soluzion plui semplice e adate aes propris esigjencis.
Il docufilm coprodusût de ARLeF e di Arte Video, cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, al conte un fat restât platât par 500 agns. La storie e je chê di Marc di Murùs, l’ultin Puartebandiere dal Stât patriarcjâl di Aquilee, l’unic nobil che si è oponût ae invasion di Vignesie, tor dal 1420. E je une storie tornade a lûs dome di pôcs agns, di cuant che intal 1986, intant di un restaur, e je stade cjatade une letare platade fra lis pagjinis di un libri. La pelicule e je un prodot di grande cualitât ancje graciis ai aprofondiments storics dal professôr Franco Cardini, une vore cognossût in television, e di Alberto Travain, autôr e curadôr di cetancj saçs su la figure di Marc; Flavia Maria De Vitt, docente di Storie medievâl te Universitât dal Friûl; William Cisilino, diretôr de ARLeF; Gianfranco Ellero, autôr di une vore di monografiis su la storie dal Friûl. Ancje il cast al è di alt profîl, tacant dal protagonist, il brâf atôr Paolo Mutti.
Al è un film che al met adun precision storiche e emozion, fevelant di identitât, olse e memorie. Rivâ su Prime Video al è un pas impuartant par condividi cheste storie cuntun public ancjemò plui grant.
Dongje dal fat che il film al è su Prime Video, al è ancje di segnalâ che di pôc Arte Video e à cjapât il ricognossiment “preferred vendor” di Amazon e la certificazion “Preferred Plus” di iTunes/Apple TV, tant che aziende cualificade pe codifiche, localizazion e distribuzion di contignûts video.
