fbpx

“Maraveis in sfrese”

Omaç ae musiche e a la art dal Friûl, dal secul XVI a vuê

Musiche, leterature e piture dai plui grancj autôrs furlans dal secul XVI a vuê, a àn componût lis pagjinis intensis dal spetacul “Maraveis in sfrese” che ai 21 di Lui dal 2019 al à sierât Mittelfest 2019, inte curnîs splendide e plene di int di Place dal Domo a Civididât. Un event di profîl artistic une vore alt e plen di sugjestions, che al à metût in sene musiche, cjant, videoart, recitazion e danze intun ecuilibri savint di lengaçs e di autôrs diviers.

Foto © 2019 Alice BL Durigatto / Phocus Agency

Promovût de ARLeF -Agjenzie Regjonâl pe Lenghe Furlane, sot de direzion artistiche di Marco Maria Tosolini, il conciert “visuâl” al à vût tant che interpretis la preseade Orchestra giovanile Filarmonici Friulani, unic esempli in regjon di ensamble gjestît e coordenât di zovins sot dai 30agns, vuidât in maniere autorevule e eficace dal diretôr Walter Themel. Insiemi ae corâl Nuovo Auricorale VivaVoce, direzude di Monica Cesar, a àn dât une otime prove di cemût che si son savûts movi cun sigurece fra autôrs e musichis di epochis diviersis, caraterizadis tant di solenitât che di origjinalitât e di frescjece compositive. Il viaç inte storie musicâl dal teritori al à cjapât dentri il public intun percors che si è viert cul Imni dal Friûl di Valter Sivilotti, e che si è a man a man disvilupât su lis notis di Jacopo Tomadini, Alfredo Scannact (pseudonim di Francesco D’Altan) riviodût di Daniele Zanettovich, Adriano Galliussi, AlbinoPerosa, passant dopo ae contemporaneitât cul stes Zanettovich, AlessioVenier, Federico Gon e Renato Miani, cuntune prime assolude, par sierâ cu lis composizions di Cecilia Seghizzi, Gianfranco Plenizio e, infin, cul compositôr cec Antonín Dvořák (cuntune Danze slavein regâl al Friûl, puarte di orient).

A fâ di cuintripont ae musiche a son stadis lis imagjins des oparis di grancj artiscj furlans -dal Pordenone a Giovanni da Udine, di Cameo ai Tiepolo, di Colavini a Napoleon Pellis, di Basaldella ai Ciussi, Zigaina, Bront, Cragnolini, Celiberti -pe plui part gjavadis de colezion preziose de Fondazione Friuli e curadis di Federico Màzzolo, salacor ancjemò plui sugjestivis in gracie de complicitât de gnot, de proiezion a grandis dimensions sul flanc dal Domo, e ancje de prestazion curte ma intense de balarine Matilde Ceron. I tescj dal dramaturc CarloTolazzi –interpretâts de atore Clare Donada – a son stâts il siôr leam naratîf di chest viaç inte miôr art dal nestri teritori, ufrint une “vision” che e à messedât lis storiis plui veris dal Friûl storic ae imagjinazion libare, tiessint un dialic calibrât cu lis diviersis sensibilitâts dai tancj autôrs proponûts e lis tantis maraveis de serade.

Foto © 2019 Alice BL Durigatto / Phocus Agency

MUSICHIS
Valter Sivilotti, Jacopo Tomadini, Alfredo Scannact, Andriano Galliussi, Albino Perosa, Daniele Zanettovich, Federico Gon, Renato Miani, Alessio Venier, Cecilia Seghizzi, Gianfranco Plenizio, Antonín Dvořák

Orchestra giovanile Filarmonici Friulani direzude di Walter Themel
Nuovo AuriCorale Vivavoce direzût di Monica Cesar
Direzion artistiche: Marco Maria Tosolini
Videoimagjins di art: Federico Màzzolo
Tescj in lenghe furlane: Carlo Tolazzi
Vôs che e recite: Chiara Donada
Une aparizion: Matilde Ceron
Coordenament de produzion: Roberto Lizzio
Produzion Mittelfest 2019 e ARLeF – Agjenzie Regjonâl pe Lenghe Furlane, in colaborazion cun Fondazione Friuli

Date de Iniziative: Lui 2019

Consulte i materiâi

Ogjet Cjale
Video promo dal spetacul
Program de serade

Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304