Al è timp fin ai 25 di Zenâr. Lu à bielzà sielzût il 76% dai gjenitôrs
In chescj dîs, tantis fameis furlanis a son clamadis a fâ une sielte educative impuartante: iscrivi a scuele i lôr fîs e sielzi il furlan tant che materie curicolâr. Fâju cressi plurilengâi al è un tra i regâi plui preziôs e che a durin di plui che si puedi fâur. In Friûl, ancje a scuele, ducj i fruts a àn la pussibilitât di fâlu in mût naturâl.
I vantaçs cognitîfs, sociâi e culturâi di une educazion plurilengâl a son cetancj: par esempli, imparâ il furlan a scuele al à efiets positîfs sul aprendiment di altris lenghis! Nol è un câs, duncje, se ancje l’an scolastic passât, inte scuele de infanzie e inte primarie, passe il 76% dai gjenitôrs al à dit di sì al furlan a scuele.
Al è timp fin ai 25 di Zenâr par sielzi l’insegnament de lenghe furlane par l’an scolastic 2021/2022. La sielte si fâs tal moment de iscrizion al prin an del scuele de infanzie, de primarie e de secondarie di prin grât (in linie, sul portâl dal MIUR https://www.istruzione.it/iscrizionionline/) e reste valide par dut il cicli scolastic.
Par scuvierzi ducj i vantaçs di une educazion plurilengâl, dimostrâts de ricercje sientifiche, visite la pagjine di aprofondiment https://arlef.it/progjets/furlan-a-scuele/
