I 947 agns de costituzion dal Stât patriarcjâl furlan, fondât ai 3 di Avrîl dal 1077, a saran celebrâts a Tarcint.
Lis celebrazions uficiâls de Fieste de Patrie dal Friûl 2024 a son in program par domenie ai 7 di Avrîl, cuant che il Comun di Tarcint al cjaparà il testemoni di Caprive, dulà che si veve celebrade la Fieste l’an passât.
La ricorince, ricognossude in maniere uficiâl de Regjon Autonome Friûl-Vignesie Julie dal 2015, e gjolt de poie de Regjon stesse e de ARLeF e de colaborazion dal Istitût Ladin Furlan “Pre Checo Placerean, e si figure tant che la ocasion par celebrâ in comunitât i valôrs culturâi, linguistics e identitaris dal popul furlan.
IL PROGRAM DE ZORNADE
Lis celebrazions a tacaran in place Libertât, aes 9.30, là che al è previodût l’incuintri dai partecipants e, come par tradizion, la esposizion de bandiere dal Friûl, compagnade de Bande musicâl ex alpins di Cuie. Aes 9.45 il corteu si movarà bande il Domo (vie Rome), là che aes 10 i rapresentants des trê diocesis dal Friûl a disaran Messe par furlan, cun leturis e preieris ancje par sloven e todesc. La funzion e sarà acompagnade de Corâl “San Pietro Apostolo” di Tarcint.
Des 10 indenant al larà in onde il speciâl “Fieste de Patrie” su Telefriuli (canâl 11) che al trasmetarà in direte la liturgjie e, subit dopo, la cerimonie civîl inte trasmission “Il campanile della domenica”. Finide la messe, aes 11, in place Rome, si esibissarà il grup folcloristic Chino Ermacora. Aes 11.30, inte sale Margherita (viâl Olinto Marinelli), a scomençaran lis celebrazions civîls cu la esecuzion dal Imni dal Friûl e la leture de Bole imperiâl.
Dopo dal tradizionâl scambi de bandiere tra il sindic dal Comun che al à ospitât la manifestazion l’an passât (Caprive) e chel di chest an, a saran i salûts des tantis autoritâts intervignudis.
Tal dopomisdì, des 15.30 indenant, palaç Frangipane (place Cornelio Frangipane) al vierzarà lis puartis pai itineraris culturâi: a son in program lis visitis vuidadis ae mostre e al laboratori permanent dai Mascarârs, al Museu dal Grup Folkloristic Chino Ermacora e ae Mostre “Universo Donna” dal Circul Fotografic Grandangolo. Cui che al varà plasê, al podarà fermâsi a gustâ a Tarcint, cuntun menù a presit concuardât, di prenotâ, tal ristorant “Costantini” (a Cuelalt, tel. 0432.792372), te pizarie ristorant “Al Sole 2” (a Tarcint, 0432.785056), e tal ristorant pizarie “Al Tarcentino” (a Tarcint, 0432.785354).
I EVENTS COLATERÂI
Par anticipâ lis celebrazions dai 7 di Avrîl, il Comun di Tarcint al à in program une schirie di events colaterâi.
Miercus ai 3 di Avrîl, des 15 indenant, inte sale Diamante dal Palaç Frangipane (place Cornelio Frangipane) si tignarà la cunvigne “Fantats, infants e zovinutis. Teatri pes gnovis gjenerazions e lenghis minorizadis”, inmaneât in colaborazion cul Teatri Stabil Furlan. In chê stesse dì, aes 20.30, inte sale Margherita (viâl Olinto Marinelli) al larà in sene il spetacul teatrâl e musicâl di e cun Dino Persello: “Il trio nus vuardi”. Vinars ai 5 di Avrîl, aes 11, l’Auditorium de scuele primarie “Olinto Marinelli” al darà acet a un incuintri cui arlêfs des classis cuartis, par cure dal Istitût Ladin Furlan Pre Checo Placerean, cu la presentazion dal fumet “3 di Avrîl 1077”. Simpri vinars, aes 18, inte Biblioteche Civiche “Pierluigi Cappello” e je invezit in program la presentazion dal libri “Quando le montagne si colorano di rosso”, di Stefania P. Nosnan
Discjame ca sot la locandine cun dut il program de zornade
Cjale ancje il calendari di dutis lis iniziativis culturâls sul teritori
Consulte i materiâi
| Ogjet | Cjale |
| Il program de zornade |
|
| Calendari des iniziativis sul teritori |
|
