Une “scuadre” di vot youtubers protagoniscj di une serie di videos su lis lôr passions
Si clame YoupalTubo: une iniziative fate dai zovins, pai zovins: vot fantats fra i 20 e i 28 agns che a contin su YouTube lis lôr passions ai lôr coetanis, cjapantju dentri midiant di videos là che la ironie e je l’ingredient principâl.
Intai mês passâts la ARLeF – Agjenzie Regjonâl pe Lenghe Furlane e à publicât in rêt un bant cul obietîf di cjatâ fantats che a vessin voie di contâ e di condividi i lôr interès, par furlan, ma no dome. E je nassude une piçule “scuadre” di youtubers. Un grup svariât par capacitâts linguistichis, etât, passions, lavôr e lûc di divignince (Fane, Tumieç, Ruvigne, Basilian, Udin, Riçûl, San Denêl), ma che in curt al è stât bon di creâ rubrichis divertentis par frontâ i temis plui diviers.
Midiant di chest gnûf canâl YouTube i fantats a podaran informâsi e informâ, imparâ e insegnâ, cjapâ o dâ ispirazion, ognidun cul so stîl! A son di fat propit lôr che a àn sielt i temis di tratâ e lis modalitâts par fâlu, cun chê di dâ forme e struture a un “lûc” gnûf che al cressarà une setemane daûr di chê altre, une rubriche daûr di chê altre.
YouTube al è dal sigûr un strument che i natîfs digjitâi a doprin une vore dispès. Par chest la ARLeF e à decidût di meti dongje dal nestri canâl istituzionâl un altri, fat in maniere direte dai fantats bogns di dialogâ cun chei de lôr gjenerazion doprant la maniere juste e la lizerece che e covente par tratâ tematichis di interès comun. YoupalTubo al vûl jessi un spazi viert a ducj, sedi par cui che il furlan lu sa ben che par cui che “lu mastie” a pene. Un lûc virtuâl dulà podê imparâ e divertîsi, scuvierzi robis gnovis sul Friûl, sui furlans e sul furlan, ma là che si pues ancje zuiâ. Al è duncje un spazi ae puartade di ducj.
Ce disino i fantats di cheste esperience?
Fabio Valvason le viôt tant che «un gnûf mût par scomençâ a tignîsi strente la nestre culture e soredut mostrâ ancje a chei altris trop che e je impuartante».
Le pensin cussì ancje Mattia Cantarutti e Federico Iob, cundut che no sedin «i miôr tal fevelâ furlan, dut câs le vin calcolade simpri tant che la lenghe “di cjase” e al è duncje une vore impuartant rivâ a dâi il valôr just». Ancje par Diego Scarsini «il furlan al è un patrimoni, capîlu al è un onôr e savêlu fevelâ e je une fortune che si à di condividi». Soredut se si pense che a fâlu a son zovins, o ben «Il futûr. Il furlan, di fat, al à bisugne (ancje) dai zovins».
Par Davide Buccheri e je «une esperience stimolante, dinamiche e buine di meti insiemi tradizion e inovazion», ma ancje «une biele oportunitât par mostrâ lis bielecis e lis diversitâts dal Friûl e de nestre lenghe», cemût che e à ricuardât Lucia Bello.
Une iniziative supuartade ancje dal supuart tecnic di professioniscj che «al permet di vê un prodot di cualitât alte», al à precisât Federico Benedet, che nol è gnûf a chest gjenar di ativitât.
Infin Francesco Colombino al à dit di savê «za dal imprin che al sarès stât un progjet impuartant e divertent soredut pai compagns che o ai cjatât. A ogni mût, al è simpri biel contâ il propri teritori e ogni argoment al è ancjemò plui interessant se si lu fâs in lenghe furlane».
Consulte i materiâi
| Ogjet | Cjale |
| Iscriviti al canale di YOUpalTUBO |
|
